老老實實，呢個Blog，唔係教大家煮餸，而係我哋三個傻佬學煮餸！試吓呢樣、試吓嗰樣，互相撞吓橋、撞吓板，一齊分享煮餸心得。我哋唔係三條友仔比拼廚藝，不過會互相批評，唔會畀面。

我們的共同點是：

三個中佬，不跟食譜，依靠味覺與直覺，大膽配搭，實驗不同菜式。

場地有三個，分別是我們自己屋企，每次煮給家人朋友品評。

開台之始，先在Jeffrey蝸居。

我認識阿Jim在先，Jeffrey在後。從Jim口中得知，Jeffrey屋企宴客係一個傳奇，幾百呎單位，可以宴請十幾位客人。而且每個星期起碼開一次party。廚房雖小，「架生」俱全。Jeffrey請客，使出混身解數，各種燒烤爐、光波爐、電磁爐、電蒸籠盡出。煮食空間由廚房延伸至客廳甚至洗手間，充份發揮香港寸金尺土的家居特色。Jeffrey太太笑說，請客時在飯枱一邊燒烤一邊吹水，一屋油煙，大開冷氣，而冷氣機的隔塵網就正好化作隔油網。

Jeffrey透露，平日與太太打邊爐，會對住部電視，在梳化前放滿木櫈做枱面，爐啦、碟啦、魚蛋啦、生菜啦，一廳都係嘢，一屋都係蒸氣。基本上，每個星期六、星期日晚飯，都係高朋滿座，坐滿蝸居每一個空間。

我們第一次開壇，三個傻佬，兩個大隻，big爆小廚房，轉身都轉唔到。洗菜洗到去廁所，飯廳餐桌可當作高級廚房的island，就在飯枱放三兩塊砧板，切洋葱切甘筍切個不亦樂乎。跟住換上電磁爐，又可以在客廳煎炒幾碟拿手菜。

起初我以為在蝸居廚房煮嘢好辛苦，怎料上門開爐，三對夫婦一齊煮飯仔，在客廳大叫：要麻油，唔該！廚房那一位就傳出來給走廊那一位再傳給我，好似人肉輸送帶！大家圍住張餐枱，邊蒸鮑魚邊飲白酒，嘻嘻哈哈，仲開心過落酒吧happy hour！

-編輯加把口-

嘩，睇你地咁煮法，食唔食得架？阿 JIM 大叫：以本傷人，以本傷人！係係係，今次開鑊先，引吓我哋吖嘛，OKOK，就追睇你哋點樣以本傷人又撞板！（這編輯確實是唔係幾好心地…）

（本文純屬作者意見，不代表香港01立場。）