自製手工肉醬意粉

愛，要具體表達。男人，點都要試下煮一道愛心菜，送給你至愛的另一半。阿Jim平日粗聲粗氣，笑聲震天，但對愛妻Amy，真係「小鳥依人」。Amy性格獨立，攀石、踩爬山單車，上天入地，女中豪傑。Jim外熱內熱，性情中人。他自言，我老婆救咗我！今次三傻Big Challenge，係煮餸送愛妻。Jim問Amy，想食乜？Amy竟然話，肉醬意粉！喂！阿姐，好平凡喎，如何煮出特色？！

真係服咗阿Jim，佢竟然手造意粉，仲係第一次學。當日，有個小女孩幫手，更添幾分樂趣。齊齊搓麵，搞到成枱都係麵粉，亂中有序，最終似模似樣，煮熟麵條備用，既似陽春麵，又似拉麵，場面熱鬧，大家開懷合作。

免治牛加調味煮熟，好Easy。最後用焗盤，先放手打意粉，再放免治，面層加Mozzarella芝士，焗至表層微焦，即成。Amy係Hello Kitty迷，佢要Jim追加驚喜，用耐熱膠模，煎出一個可愛太陽蛋，貌似Hello Kitty，又似貓頭鷹，仲有個「煲呔」pastry。咁Q嘅嘢，Amy 至愛，卻玩死大佬廚師。阿Jim嘴藐藐，煎蛋，一不小心，整爛咗隻眼，搞到小妹妹助手嘴扁扁，本想把單眼貓炒蛋算數，最後為了完成靚老婆心願，鼓起勇氣，再煎一次，完美達標。

呢一碟平凡的肉醬意粉，好鬼死不平凡，冧到爽朗Amy，變番隻伊人小鳥，幸福笑容寫在臉上。

|| 小貼士 ||

1) 意粉煮熟要過冷河，加強彈牙韌度。2) 焗芝士要焗到微焦，表層少少硬脆，咬下去才有軟硬兼施的快感。3) 免治牛肉混入羅勒切碎，清香不膩。

|| 肉醬材料（六人份）||

免治牛肉1磅去皮意大利蕃茄一罐意大利蕃茄膏1小盒洋蔥1.5個乾䓤2個Mozzarella 芝士碎1包

|| 肉醬調味 ||

羅勒一棵、鹽少許、橄㰖油香料：香葉5片、黃薑粉2茶匙、小茴粉1茶匙、紅椒粉1茶匙、黑椒碎1茶匙、豆蔻粉1／4茶匙、肉桂條1條

|| 肉醬做法 ||

先將羅勒切碎，放入免治牛肉加一湯匙橄欖油、鹽及黑椒碎攪拌，醃半小時。半個洋蔥切小粒，用牛油炒至金黃加入碎牛快炒30秒，留來備用。洋蔥乾蔥切條，牛油爆香，先加入香料及茄膏炒2分鐘，後加入蕃茄，可不加水，大滾後轉中火加入牛肉煮十分鐘便成。

|| 意大利麵材料 ||

麵粉10安士、水4安士、雞蛋1只、橄欖油1湯匙、鹽1／2茶匙

|| 意大利麵做法 ||

將蛋黃、蛋白、橄㰖油攪拌，加入麵粉，慢搓至蛋醬完全吸收，再以每次1／2安士水加入，慢搓成柔軟的麺糰，用保鮮纸包好置於室温1小時。將麵糰分成小塊，用搓麵棍壓成約1mm厚的粉皮，用刀切成約闊2mm即成。最後以滾水煮麵2分鐘，過冷河，再拌入少許橄㰖油，放入玻璃容器，將蕃茄牛肉平均舖上麵上，面撒上mozzarella 芝士，以170度焗15分鐘便成。

（本文純屬作者意見，不代表香港01立場。）