Jim愈來愈喜歡玩美食設計，食物精緻而複雜，菜名也愈搞愈長，今次竟命名「日法式海鮮卷配炒椰菜花米籽」，總共14個字，嚇鬼咩！最後我們簡而化之，叫「Jim Chu海鮮卷」，有名你叫，Jim Chu，奄尖，一定搞到雕花咁靚。

奄尖之一，海鮮卷竟有三層，底層有酥皮，中層有石斑塊，面層有火雞片，用法國蛋黃醬及日本麵豉醬混和，把三層粘貼。  奄尖之二，他為了美觀，把斑塊切成小圓圈，而上面的火雞片，他捲成一朵玫瑰狀，入焗爐時用牛油紙圍邊，務求有cup cake效果。  奄尖之三，精製伴菜，打碎松子仁，攪爛椰菜花，加㰖油、蛋漿、青醬，真係要求高！嘉賓區家麟自言不是食家，只係跟朋友食好嘢。但當他吃下Jim Chu海鮮卷，評語是眾多嘉賓之中最細緻的。他最欣賞的是──味道豐富的椰菜花米籽！海鮮卷成功，Jim Chu 開心到跳舞！

日法式焗海鮮卷配炒椰菜花米籽

海鮮卷材料：

石班塊、帶子肉、蝦、魷魚、酥皮、火腿片

伴菜材料：

椰菜花、松子仁、蒜頭、香草青醬、雞蛋

調味：

法國蛋黃醬、法國芥末、日本白麵豉醬、紫菜粉Dill weed

主菜做法：

先把酥皮切圓形，放入焗爐以170度焗20分鐘。做好批底備用。以2份蛋黃醬比半份麵豉醬混合，加入少許法芥、紫菜粉和dill搞拌。將魚肉、帶子洗淨切成適當大小，用少許火腿包裹卷起，塗上混醬，放回酥皮批上用鋁紙蓋好。入爐以120度焗15分鐘即成。

伴菜做法：

松子仁入焗爐烤香後打碎。椰菜花和蒜用攪拌器打成米狀。雞蛋打成蛋漿。落欖油於熱鍋，放入菜花等材料中火快炒，加入蛋漿，見有蛋絲就轉小火落青醬，落少許鹽及黑椒碎調味。炒好後舖平於碟上以80度入爐收乾多餘水分即成。口感會似炒飯。

（文章純屬作者意見，不代表香港01立場。）