三傻開檔之初，Jeffrey 好廚藝，菜式好味，賣相勁頹！不過經 Jim & Eric 笑到面黃之後，如今突飛猛進，大賣色相，好有睇頭！

今次佢話煮 Curry Prawns，重手出擊，嘩，用咗九萬幾樣香料——芥末籽、洋蔥、蒜蓉、乾蔥、咖哩葉、蝦、蕃茄粒、薑黃粉、孜然粉、辣椒粉、紅甜椒粉、指天椒、椰絲及椰奶——搞到蝦碌咖哩香噴噴，勁惹味。

點知 Eric & Jim 「唓」一聲：「咪又係喇沙一 pat！？個樣好頹呀！」

原來 Jeffrey 有 secret weapon——活火山！！！

用小杯子做火山模，將軟飯壓出山形，倒出火山上碟，仲要喺火山口，淋上藍莓汁，火山爆發，咖哩蝦在山腳化為熔岩，熱辣好味，色相、味道、意境，啱啱好！

Jeffrey，你好爆！

 食材：

蝦椰奶椰絲芥末籽指天椒洋蔥粒蒜蓉乾蔥蕃茄粒咖哩葉薑黃粉孜然粉辣椒粉紅甜椒粉

煮法：

1. 蝦去頭去殼，抹乾，用鹽、黑糊椒醃半小時；2. 落油爆香芥末籽，中火加洋蔥，洋蔥軟後落蒜蓉、乾蔥、咖哩葉、蝦、蕃茄粒、薑黃粉、孜然粉、辣椒粉、紅甜椒粉、指天椒及椰奶煮至蝦熟；3. 落魚露、鹽及糖調味，然後加入椰絲，汁變成濃醬便完成。

小貼士：咖哩類菜式，最好配上飯或包餅，咁就唔會浪費啲咖哩汁。今次我用飯，Jim 建議用個杯倒模成一個山，我亦加上一點紫藍色係飯上面，令普通的白飯變得不普通。方法好簡單，用水浸藍莓乾，就是用呢啲藍莓水輕輕把飯染色。

（文章純屬作者意見，不代表香港01立場。）