由《毛俠》及《爸爸》導演之一區焯文執導的紀錄片《毛家》，拍下拯救流浪動物的義工日與夜工作，電影自8月21日上畫以來口碑不絕，在不少謝票場中更獲明星支持。日前就有影帝張家輝駕臨，更分享自己養狗的經驗。

張家輝之前都一直有養狗，但離世後因心情太難過，有想過不再飼養，但過了一、兩星期後，太太關詠荷覺得不習慣，無論如何都要重新養一隻。於是家輝便在其中一間動物中心領養一頭唐犬，而這個經驗又叫家輝有所感受︰「如果大家要養動物，我主張可以養唐犬，因為真係冇乜病痛，佢哋好健康生命力好強，唔會話耳仔有菌，呼吸系統有困難，骨骼有問題，一啲事都冇。」

而領養後，家輝覺得這隻「朋友」給予自己好大樂趣。「狗對我嚟講係最忠誠嘅朋友，佢唔會妒忌你，就算你著住條底褲周屋走，佢都唔會話你冇禮貌！你同佢講心事又好似識聽。你對佢好佢又會對你好，難聽啲講句，同狗做朋友好過同人做朋友，佢對你的忠誠度好高。」而去年，家輝就被內地網民拍到他在中環跟愛犬跑步。