【任噏亂評】TVB召喚舊將谷收視 居然可以有人情味到咁?

撰文:陳奕熙
出版:更新:

TVB回巢潮一浪接一浪,突然咁多人返嚟都唔係冇原因,舊陣時,TVB好鬼高傲㗎嘛,幾時輪到TVB就啲藝人呀?話一就一、話二就二,TVB說馬明要踩27個鐘,就踩27個鐘,諗諗下要個員工OT到咁真係幾冇人情味。

《全職沒女》、《不懂撒嬌的女人》出街之後,發現搵舊人擔正的Formula好似幾Work,當然打蛇隨棍上,急召更多好戲之人返屋企啦,咁出殺手鐧啦!咩殺手鐧?咪就係同以前調轉返,加少少愛心、加少少體諒,溝返啲人情味出嚟囉。

宣萱的《不懂撒嬌的女人》大獲好評。(資料圖片)
馬明BB踩廿幾個鐘真係好慘。(資料圖片)

TVB都真係為咗谷人情味作咗一個好大嘅改革,就係畀啲演員有充足嘅睡眠時間,已經返咗去既宣萱同張衛健都有講過,依家拍劇終於有覺好瞓,坦白講瞓覺對人嚟講真係好重要,一般打工仔一日返8-9個鐘工都嗌晒救命,可想而知啲藝人日日拍十幾個鐘,甚至踩兩三日唔瞓係幾攞命。

而最貼心嘅一個行為就要數,近日傳出TVB打算開拍電視劇《再創世紀》,想搵番愛女鍾嘉欣做女主角,說實在嘉欣BB唔算回巢,因為佢仲未完約,還是旗下藝人,TVB想搵佢開劇大可以下十二道金牌召佢返嚟,但TVB今次就做咗個好Sweet嘅行為,傳聞話雖然嘉欣BB喺劇入面佔戲份唔少,但TVB都體諒佢要湊女,打算佢嘅部分喺溫哥華取景。

TVB為畀嘉欣BB照顧囡囡仲將佢戲分安排係溫哥華。(資料圖片)

講真打份工大家都求開心啫,咁樣你就下我、我就下你咪幾好,好多時藝人離巢都不過係想出去見識下,話唔定見識完啲戲仲好咗。對員工好啲,等佢哋開心啲,離咗巢都仲肯為公司賣命,咁先可以做到Win win雙贏!