自《不懂撒嬌的女人》後游生袁文傑人氣急升，45歲的他更被傳無綫以過百萬簽做親生仔，游生之所以受歡迎，除了高大靚仔外，最重要keep得好，一點老態都沒有。可能亞視人真係有保持青春秘技，和游生一樣保持到昔日外貌的還有43歲陳煒，二人在亞視年代已合作過，最近一次是在2004年亞視劇《我和殭屍有個約會III之永恆國度》，事隔13年，他們終於在TVB新劇《果欄中的江湖大嫂》再合作。

今日煒哥就在微博放了和游生的合照，寫上「十幾年冇同你開過工啦!袁文傑o依家叫你傑仔好呀、高佬好呀、定係游生好呢？」網民大讚兩位防腐了得，保養得好，對煒哥來說已不是新聞，她曾經接受《香港01》訪問，也說過少少保養心得，她說：「我一日食兩餐㗎咋，平時唔駛開工，11點食第一餐，又唔會太特別，照正常咁食囉，跟住大約下晏5點幾就食晚餐，我食啲好單一嘅食物，白粥啦，再加個自己整嘅菜，好簡單一個餸，如果要開工就冇計，但都會食少好多。但一定唔飲凍嘢。」總之一個字，清。但最想不到是網民，竟然有不少留言表示看過此劇，更說「陳玄霜與方兆南終於重遇喇」、「亞視最襯的一對」，原來這套97年亞視劇集當年平均有8，9點收視，製作費達三千萬，當年更去到國內取景，男主角是「再鋒利的刀」姜大衞，女主角是楊恭如，當年游生得25歲、煒哥24歲，好青春呀.........對於同游生再合作，煒哥再表示好興奮，她說：「呢次喺劇入面大家會有好感，應該都多對手戲，都好開心呀，好耐冇合作，以前佢好𡃁仔囉，我都係好後生，大家都同以前好唔同。」