【星和無綫電視大獎】王浩信扮盲俠奪視帝 《踩過界》成為大贏家
撰文：李妍樺
出版：更新：
由TVB同新加坡嘅StarHub TV合辦嘅《星和無綫電視大獎》嚟到尾聲，最令大家期待嘅莫過於最佳男主角同女主角獎，男主角最後5強分別有陳展鵬、王浩信、蕭正楠、張兆輝同苗僑偉，淨係睇牌面已經知係陳展鵬同王浩信之爭，雖然展鵬連續拎過3年，但大台依家蜀中無大將，頒畀佢都唔出奇。而近年力捧嘅王浩信，大台力谷佢一年兩套重頭劇《不懂撒嬌的女人》同《踩過界》，幾乎差唔多係將個獎餵到佢嘴邊咁款，所以王浩信拎男主角獎呼聲相當高！
恭喜晒王浩信。
終於開估喇！原來係《踩過界》成為大贏家，由王浩信同李佳芯包辦晒視帝視后，相信大家都跌晒眼鏡，其實未開跑之前王浩信都贏咗9成，爭在係邊套劇拎嘅啫，今次先拔頭籌拎視帝，睇嚟之後嘅萬千星輝頒獎典禮都係佢嘅囊中物！王浩信由2008年第一套劇《野蠻奶奶大戰戈師奶》做配角，捱足9年終於拎視帝，相信老婆Yoyo好戥佢開心。