【星和電視大獎】黃心穎張振朗奪配角獎 心穎bb爆喊:無諗過有獎
撰文：黃梓恒
出版：更新：
《星和無綫電視大獎2017》話咁快已經接近尾聲，一堆綜藝節目獎亦已經揭盅，洪永城主持的《退休地圖》獲頒「我最愛TVB資訊節目」，袁偉豪及楊明主持的《打工捱世界II》獲頒「我最愛TVB綜藝節目」，Maria Cordero（肥媽）及陸浩明奪得「我最愛TVB綜藝節目主持人」，而歌曲獎則由菊梓喬的「忘記我自己」獲觀眾投票成為「我最愛TVB電視劇集歌曲」。
陸浩主持就多，今次拎獎真係少可。
至於比較重頭戲，黃心穎憑《與諜同謀》獲得「我最愛TVB女配角」獎項，她表示：「自己無諗過會有獎拎，一直都覺得自己無可能會上台，原來我真係會care，所以真係好開心呀，一宣佈嗰刻立即就喊。覺得好似五年以來嘅嘢好快喺我腦海飛過，多謝咁多人支持我同相信我，係咁喊可能係我一直以來嘅情緒，因為我唔識去表達自己，今次真係好多謝公司俾呢個獎勵自己。」
心穎去到後台仲喊緊。（BigBigChannel）
而「我最愛TVB男配角」一獎則由張振朗以《踩過界》勇奪，振朗一上台就係咁喊，在接受訪問時說到：「我對眼真係腫晒，未上台嗰陣王浩信、朱千雪同蔡思貝已經同我握晒手，我話唔好喇我已經忍唔住，再嗌我真係崩潰喇。其實上到台我已經開始定返，但係一講嘢又忍唔住，不過見到好多人喺度笑緊，其實都幾好笑，因為我將自己最真實嗰一面呈現咗出嚟。其實嗰一吓腦中真係一片空白，啲人話我講咗好多嘢，其實我都唔知點解，最後要多謝返我屋企人！唔會咁快諗第二個獎喇，呢個可以攬住過廿年。」
對眼真係腫晒。（BigBigChannel）