【TVB Secrets】設內部審查組投訴機制　公司主席親自保密處理　

今日令人最O咀消息，就是TVB文明大倒退！有傳TVB為了北望神州，側重內地長遠發展，所以下令要女星有咁密實得咁密實！近至台慶不會再見到女藝員鬥性感，遠至未來拍劇都不再有強姦、情慾場面，真係連用CG遮心口都慳返。雖然消息指TVB唔係完全禁胸，有需要嘅情況之下都會賣下性感，但係幾可會有需要？咪又係港男港姐！所以都係買少見少㗎喇！不過今次樂小姐Whatsapp發告示，短短500幾字，仲有好多玄機。除咗順勢推Big Big Channel衝出中國，要珍惜每分每秒做直播之外，而且還有開心大發現，就是TVB原來有告密機制：內部審查組。

咩係內部審查組？就好似明朝嘅東廠咁，當藝員喺工作上有不平等、不愉快嘅經歷，就可以用文字形式以Email方式向公司講，公司主席會親自處理單case，而且係會保密。雖然呢個機制似乎好顧及到藝員人事、心理需要，但實際是形同虛設。事關有知情者表示，如果工作上有咩啲想法見解想講，多數會直接向樂小姐講，咁樣係最快最直接，而且樂小姐會親自開解，講下可以有咩做法改善之類。有啲咩唔開心或者困難而去搵投訴機制，內部審查組入面嘅同事唔止一個人，pass來pass去，有人就會有是非，「咁咪等於全公司都知？」東廠雖然至高無上，但是難以接近。至於今次TVB禁胸，基本上冇人Say No，想爭取更多曝光率，看來要用下腦力。