【收視分析師】爭產劇打唔入國內市場 《溏心3》只係「還可以」

撰文:溫菁莉
出版:更新:

歡迎收睇逢星期三中午嘅《收視分析師》,是咁的菁姐我終於係日本happy完返嚟,繼續開工同大家一齊睇收視。上星期客席主持玲姐就講到播出兩個星期的《溏心風暴3》恐怕就快跌穿20點,究竟成績係咪真係咁慘不忍睹呢?無見一個星期嘅收視表,今日下午打開睇就無太大驚喜,因為《誇世代》及《溏心風暴3》分別是23.1點及21.4點,同上星期相比只是低1點,都算係咁喇...一啲都唔意外囉..

收視最令人震驚嘅,一定係《開心速遞》高過《溏心3》。
《溏心3》官方微博日前出post,話播放量有5億。

其實TVB家陣都面向祖國,既然要探討國情,咁識睇一定睇微博,幾乎每套內地劇都有官方微博,《溏心3》都唔例外,上星期仲出post指劇集在網站播放量破5億!何謂播放量,即是當用戶打開影片播放頁面,影片成功加載,就算為一個播放量。

對於香港觀眾嚟講5億係天文數字,心入面一定OS話「咁勁!」,但其實5億真係濕濕碎...因為古裝劇《三生三世十里桃花》嘅播放量有414億,係《溏心3》嘅80幾倍呀,係80幾倍呀!!完全係望塵莫及!

豆瓣網站對於國內觀眾好有指標性,低過6分可以直接棄劇!
順帶一提,《溏心3》係內地歸納為國產劇。

而《溏心3》的官方播放網站亦有8.7分,係究竟當中有無「水軍」呢?當然不得而知,但超過8分,已經係佳品嚟㗎,起碼無負評先!非正式統計,內地觀眾以網站《豆瓣》來選擇睇定唔睇套劇集,如果呢嗰係網站評價低過6分可以直接棄劇,咁啱《溏心風暴3》點擊率只有6.9分,評價以「煲冬瓜」嚟講只係「還行」,都只係掹車邊咋。

日前播出的內地青春愛情劇《致我們單純的小美好》,迷倒不少中港台觀眾!

講真,其實爭產劇呢種劇情真係n年都無出現過係內地市場,貪得過少少千幾萬錢,完全不符合國情,所以點會係內地紅得起呢?內地近年都興起玄幻劇、古裝劇《三生三世十里桃花》、《那年花開月正圓》、《楚喬傳》等等,每套都贏盡口碑, 破100億完全無難度。最近仲要有一套風魔不少萬千少男少女嘅青春愛情劇《致我們單純的小美好》,開播唔足一個月嘅時間,網路播放量也已突破12億,證明咗拍青春愛情劇都係一條血路,唔知TVB又會唔會跟風即刻拍返套呢,湊下熱鬧咁呢?!