【公子會】謝安琪飛Long D藝術家男友 多年後向對方懺悔
謝安琪(Kay)日前作客森美和劉翁主持的電台節目《公子會》，大談過去情史，性格陽光開朗的阿Kay，經歷過同憂鬱藝術家鋼琴男拍拖唔work之後，下一段感情，遇上樂觀正面的易經男。
同初戀男朋友一樣，易經男都係一個藝術家，但思想比較正面，性格比較陽光，而且鐘意睇易經。有趣的是初戀鋼琴男係建築師，易經男則是室內設計師，Kay 似乎對建造業的男仔情有獨鐘。這段感情維持了近六年，中途還因男方移民美國而發展成Long Distance 的戀愛。
阿Kay大讚易經男是一個上進的男生，在美國半工讀，打工的錢拿來交學費，將平時在餐廳打工的一蚊兩蚊美金貼士儲起來，用作平日同阿Kay 傾長途電話的電話費，及資助阿Kay 買機票到美國。這樣的長途戀愛維持了兩年，最後因阿Kay 抵受不住「明明有男友但又過著單身生活」的煎熬，加上身邊的朋友不斷放閃，令她非常難受，所以她將所有冤屈都算在男朋友頭上，最後還選擇分手。雖然分手多年，阿Kay仍大讚這個易經男人好好，二人依然是好朋友關係，阿Kay甚至坦言，曾經向易經男懺悔，「我同佢講，我覺得我當年好無情，當時可能太年青，唔識得珍惜感情，我唔知我當時有無好傷害到你，我知一定有，但唔知有幾深，我想道歉。」
阿Kay 這兩段感情都分別維持了七年同六年，相當長情，主持人劉翁問阿Kay：「你會唔會同個女講，唔好喺初戀上花咁長時間呢？」Kay坦言：「都好想同佢講，試多幾個男仔先啦。咪以為初戀就會到去結婚，就會直到永遠，我以前都以為係咁㗎，你結咗婚之後都有機會遇上好正嘅人，但你又結咗婚喎，你哋只可以互相欣賞，所以我覺得唔好咁早結婚，結婚之前真係要多啲見識，你先會更加了解自己。」的確，經歷過兩段刻骨銘心的感情， Kay 終於知道怎樣的對象最適合自己，最後情歸張繼聰，即使在最初對方無名無利，但Kay就是知道，他，張生就是The One 了。