古天樂謀拍《刑事偵緝檔案4》電影版　「我冇版權要問番版權人」

古天樂今晚（17/8）現身尖沙咀舉行著名品牌彩妝派對。最近無綫深夜重播《刑事偵緝檔案4》，劇中古天樂、宣萱及佘詩曼一起聯演，事隔十年，有冇考慮過開拍電影版？古仔直言：「首先如果我收工都會返去睇嘅，因為都係幾好回憶嚟嘅，咁有10幾年無拍過電視劇，睇返都會有好多回憶出現番，至於套劇會唔會拍電影版，要問番電視台嗰邊，因為個版權喺佢哋度，如果好嘅電影，我個人都會參與拍攝。」
 

古天樂名曲《今期流行》當年唱到街知巷聞，近日網民反抄當中正確歌詞是「追命林琴」，並非「椎名林檎」，今日古仔被大批記者訪問到究竟是「椎名林檎」定「追命林琴」？古仔笑說：「你自己講多次呀，你講咩呀，其實睇個人喜好啦，你鍾意『吹』咪『吹』囉，你鍾意追咪追囉。」令在場所有記者啼笑皆非。