陳凱琳盼夫妻檔合作拍電影 鄭嘉穎：佢係我哋嘅當家
撰文：朱奕錦
出版：更新：
鄭嘉穎和陳凱琳（Grace）婚後首次出席活動，所謂「貴人出門招風雨」，戶外大雨滂沱，嘉穎一舉一動都護著太太，真係sweet到爆。結婚未夠半個月，但兩人已經開始投入工作，不過嘉穎表示並無影響：「我覺得兩方面都可以同時進行嘅，因為而家啲工作都唔係話拍戲啦，都係宣傳工作比較多，咁……係唔辛苦嘅，我哋要學習嘅一樣嘢就係multi-tasking，同時間要做好幾樣嘢，而家多咗個家庭要顧及。」
活動當晚落黃雨，嘉穎一手拖著Grace，一手擔遮，小心護著太太，真是羨煞旁人。（梁碧玲攝）
活動上，嘉穎和Grace表示兩人不介意夫妻檔搵真銀，只要有適合的工作就無問題，而Grace就希望兩人可以合作拍電戲：「因為對上一次就拍《殭》啦，就係啱啱認識嘅時候，咁我諗而家再拍，個默契會更加唔同囉。」不過嘉穎就話想拍一些輕鬆的題材，笑言「不如拍廣告算啦！」笑話歸笑話，一講到家中邊個掌握財政大權時，嘉穎摸著Grace的頭說：「佢係我哋嘅當家，都係佢管嘅啦。」身邊的Grace望著老公，會心一笑，相信已經甜上心頭。
嘉穎和Grace不介意夫妻檔搵真銀，透露太太掌握財政大權。（視覺中國）
早前有報導指兩人的新居正在裝修，不過嘉穎就說其實只是買了兩個單位用來投資，現在已經有人租用，所以只是謠言。至於之前有話兩人住酒店，嘉穎打趣地說：「Grace講攰呀嘛，所以搵人服侍下，如果唔係酒店，就係我嚟㗎啦。」既然現在已經結婚，不知道兩人的稱呼有沒有什麼變化呢？「都係baby。」嘉穎透露，不過Grace就搶答「我多咗嗌佢老公嘅。」嘉穎都好識做，即刻同大家講：「而家介紹，我太太！我都未講慣，佢都未聽慣。」兩人你一言我一語，真是隔著個mon都感受到他們有幾幸福！
嘉穎指現在兩人還沒習慣叫太太和老公，不過Grace就「抱怨」說有人叫自己「鄭師奶」，她笑言未至於。而身邊的嘉穎即刻護花「我哋一步步嚟。」（梁碧玲攝）