【歡樂滿東華】黃建東扮經典大隻人物 攞正牌「大開食界」

撰文:冼燕珊
出版:更新:

無線搞笑藝人黃建東最擅長扮鬼扮馬,繼早前扮《延禧攻略》的「偽瓔珞」後,最新搞作是在 TVB周刊中扮演歷屆《歡樂滿東華》最令人難忘的人物,包括吳剛師傅。

黃建東將於《歡樂滿東華》中扮演吳剛師傅。

今次扮吳剛師傅,令黃建東可以攞正牌食嘢同埋化身大隻佬:「拍攝工作如果遇上劇情需要我食嘢係最開心,因為我自己真係好為食,但係平時不斷俾人催谷我要減肥,搞到我唔好意思喺人前食咁多嘢。而家導演指定要我食,我唯有服從指令食多啲。」

黃建東今次奉旨開懷大食。

除咗食嘢之外,黃建東最開心可以化身大隻佬償還心願:「其實係講我要扮吳剛師傅,入行咁耐都係第一次着肌肉衫。自出世以來都未試過真正大隻,原來大隻嘅自己都幾正幾嗒得杯落。(咁有冇着完件衫的起心肝操大隻?)真係唔敢再講話的起心肝減肥,因為好似減極都咁肥,但變大隻的確係我嘅心願,相信有一日會實現。」

黃建東笑言大隻嘅自己都幾嗒得杯落。

問到黃建東自入行以來,參與那一年《歡樂滿東華》的表演是最難忘,他笑言應該是2012那屆,因為他第一次參加「卡啦之星」演出,特別度了自彈自唱及 rap出東華精神呼籲大家凌晨仍要落力募捐,演出跟香港先生的才藝表演有些相似,創意同樣獲得大家嘉許:「我發覺我演出自己的創作是最得心應手,而大家又很喜歡,所以嚟緊會再自己度橋拍返搞笑片,希望可以帶多啲歡笑俾大家。(TVB周刊實體版出最後一期有何感受?)當然會唔捨得,因為自己都是 TVB周刊的擁躉,已經留起最後一期做留念,希望將來網上版可以再見大家。」

+4