【蝕日風暴．專訪】最美麗變性人Poyd不覺自己特別：我係個普通人
由張智霖、王陽明和薛凱琪主演的網劇《蝕日風暴》正於「黃Viu煲劇網站」熱播，劇集甫上架即成為整個平台的收視冠軍，非常犀利！除了一班主演的瞓身演出值得留意外，一眾配角亦非常值得留意，包括有「最美麗變性人」美譽的Poyd！戲中，她與梁靖琪出身入死，但最後卻因壞人逼害而中毒身亡。
近年，Poyd專注於大中華地區工作，先後為多套電影，包括《掃毒》（2013）和《賭城風雲II》（2015）演出，同過張家輝、周潤發等巨星合作，可算是泰國「最幸運變性人」，不過她從來不覺得自己比起其餘30萬由男性成女性的泰國變性人特別幸運：「因為我哋當中都有好多有才能嘅人，之前我去理工大學都有講過類似話題，我覺得呢樣嘢唔係單純係跨性別人士嘅事，而係男女不平等同其他不平等嘅事，我好似講遠咗？講返條問題先，我唔會覺得自己特別幸運，我只係覺得我係佢哋嘅其中一個，都係一個普通嘅泰國人。」
相對於泰國，香港絕對不是一個非常適合跨性別人士生活的地方，Poyd亦認同這個睇法：「我知道有個個案，事主已經變咗性，冇人知佢係跨性別人士，因為從外表睇，佢同真女人一樣，其實佢哋唔想講大話掩飾自己，但係佢哋亦都唔想畀其他人排斥，其實成件事係好悲哀。（應該要點克服？）千祈唔好諗自己同其他人唔同，因為我哋都係一樣，你要強調自己價值，唔好等人哋畀機會你，要做最好嘅版本嘅自己，千祈唔好諗住抄其他人，唔好覺得自己嘅身分係一種罪過。」
至於在香港工作時曾否遇到歧視情況？Poyd即答謂：「歧視？我講唔出，因為我從來都感覺唔到，至少我冇感覺到唔開心，或者係我唔多識廣東話？哈哈！不過對我嚟講，人生確實係好苦短，所以如果夠能對人奉獻，對人對自己先有意義。」講到她廣東話麻麻哋，問近年多次來港工作的她有否進步過？她笑謂：「我唔肯定呀，因為我唔係點樣成日講，但開工時劇組都成日教我講，我諗嗰時講得叻啲。（仲記得啲咩？）我記得『大家好』、『好耐冇見』同『好衰㗎』。」