汪明荃手寫tag後要挑戰IG story 嘟姐：我諗要去一趟佢屋企
撰文：鄺鈺瑩
出版：更新：
阿姐活到老學到老，一玩ig即時掀起熱潮。
自創手寫Tag嘅汪明荃(阿姐)，一開IG就火速跑贏一眾KOL，成為網絡界紅人，之不過原來呢個手寫tag並非阿姐本意，鄭裕玲（嘟姐）日前喺商台節目提到原來早就已經叫阿姐玩IG，但對方經常以「玩微博都一頭煙」為由推卻，之不過，女人嘅嘢真係好難捉摸……眼見汪阿tag咁火爆，嘟姐日前趁台慶時就問阿姐點解要咁tag，勢估唔到阿姐係咁答。「我唔係想領導潮流、搞宣傳，我都唔明，我同人合照後，啲人成日叫我hashtag，咩係hashtag?」阿姐解釋自己本身有個明荃之友網站，每次佢出席活動有任何合照，佢都以手寫方式交代同咩人合照，再由網站負責人上載，如今佢只不過套用呢個tag喺IG。
嘟姐大讚阿姐啲tag超認真，一字一線都係手指寫出來。
嘟姐指阿姐每個tag都親自處理，條紅線亦都指得清清楚楚，而佢台慶完騷後，返屋企仲繼續tag，玩到凌晨兩點。「佢可以去做編輯，你話佢係未幾可愛?佢有啲嘢好嚴肅，但又有啲嘢你估佢唔到。」節目主持人麻利提議嘟姐教埋阿姐玩IG story，不過嘟姐就似乎唔多想，仲話：「我嗰日同佢食飯淨係講hashtag都出晒牙血，story我諗要去一趟佢屋企，坐底慢慢講先搞掂。」
又係時候睇下汪阿tag
+7