謝霆鋒即場整蛋糕冧佘詩曼 阿佘：冇女人可以抗拒
撰文：冼燕珊
出版：更新：
謝霆鋒主持的美食節目《鋒味》系列長拍長有，新一輯嘅《鋒味》將會喺於11月24出街，噚日（21日）就喺北京舉行記者會。今輯其中一位嘉賓兼好友佘詩曼，專程由香港飛到北京撐場。
阿佘專程由香港飛去北京撐霆鋒。
阿佘之前在內地參加江蘇衛視美食真人騷《星廚駕到3》，奪得冠軍，獲封為美女廚神，佢一場嚟到，霆鋒就話要考吓佢嘅味覺，「很久以前就聽說過你的廚藝很厲害，我準備了幾種特別口味的曲奇，想讓你品嘗。」四款味道嘅鋒味曲阿佘估中晒，霆鋒都忍唔住大讚，「之前一起錄節目的時候，我就注意到阿佘超敏銳的味蕾了，真的很厲害！」咁大頂高帽笠落嚟，阿佘亦回敬返霆鋒，「女孩子一般都是沒有辦法抗拒一個男人下廚，謝霆鋒做了《鋒味》以後，特別是看到他認真做菜的時候，覺得很棒！」
其實阿佘係女廚神，所以考味覺真係難唔到佢。
為咗多謝阿佘支持，霆鋒更即場整咗個「教堂蛋糕」送俾佢，阿佘話唔捨得食，於是佢唯有不停撩蛋糕盤側邊剩低嘅cream嚟食，仲邊食邊話：「好好味呀！」
霆鋒即場整個蛋糕畀阿佘，阿佘話唔捨得食。
新一輯《鋒味》繼續有霆鋒同埋佢班friend，包括：佘詩曼、吳彥祖、林依晨、張靚穎、宋茜食勻煮勻全世界，所到之處包括俄羅斯聖彼德堡、捷克布拉格、希臘、土耳其、成都、日本等地之外，今次仲加上一個特別環節，就係霆鋒會孖嘉賓拜訪當地一位「鋒味之友」，入埋佢哋屋企廚房，為他們custom made一道專屬嘅菜式。霆鋒話：「創作主旨是希望可以把美食的治癒感傳遞給更多的人，通過美食為他人達成心願，借更多人的故事講述《鋒味》的情懷與溫度。」
識下廚嘅男人最型！
+3