黃淑蔓DSE考試勁生暗瘡肥5公斤 食炸嘢減壓:唔一齊食會好Lonely

撰文:林迅景
出版:更新:
黃淑蔓(Feanna)唱歌好好聽吖!(林迅景攝)

DSE剛放榜完畢,有人歡喜,亦有人愁。同是今屆DSE考生的樂壇新人黃淑蔓(Feanna),今日(7月13日)舉行新碟簽唱會時,就特登揀了新碟《Feanna 17+》中的《一定要得》,為應屆學生打打氣。被問到考試成績如何,Feanna接受《香港01》訪問時就笑說:「同大家報一報平安先,考試成績都達標,唔錯嘅。(有多好?)33222一定有,即係大學入學門檻。」

C AllStar成員之一陳健安仲變成小粉絲上台拎簽名。(林迅景攝)

無論是DSE考試前,又或是DSE放榜前後,不少學生都會感到很大壓力。她又是如何減壓的?Feanna回答說:「一定係心態上面,你一定會好緊張好驚。我嗰時就係因為壓力太大,生好多暗瘡。冇辦法㗎,因為每個人都一定會經歷,但係過咗呢一個階段,你就係一個勇士!對我嚟講,唱歌就係一個放鬆方法,同埋食嘢。壓力好大你淨係會想食,同埋食啲好煎炸嘅嘢,所以就會變到咁樣(肥咗),哈哈。」她表示,這一年就因為DSE的壓力,而肥了4,5公斤。

黃淑蔓(Feanna)在台上同粉絲玩遊戲。(林迅景攝)

她還反問記者,知不知道為甚麼海報上的她比較瘦:「知唔知點解?因為張Poster係考DSE之前影,哈哈。真係肥咗好多,跟住又去咗次日本,又狂食,啲朋友又喺你隔離不停食宵夜,你唔一齊食又會覺得好Lonely。」之後從哪裡着手減肥?「7月27日開始,我就要實行一個月減肥計劃。(一個月夠咩?)其實就唔夠嘅。(點減?)會戒澱粉質,戒糖,食番薯吖。(番薯都係澱粉質食物喎。)但係用番薯代餐會瘦啲,同埋會配合運動。」

+10