【金宵大廈】拒絕再做性感「花瓶」? 高海寧:Sexy嘅戲更加難

撰文:林迅景
出版:更新:

無綫劇集《金宵大廈》已接近尾聲,除男女主角Alex(李施嬅 飾)、阿蕭(陳山聰 飾)和黑貓「靚寶」大受好評外,劇中不少演員也有亮眼表現,例如飾演媽媽周小惠的高海寧就十分搶鏡。她昨日(4/10)出席宣傳活動時接受《香港01》訪問,便特別提到能夠發揮演技,很大程度也是因為劇本寫得好。「可能我對親情特別有感覺,所以拍嘅時候特別多感受,特別投入,好多場喊戲都係由心而發,都係嗰句,演戲真係唔係靠演。」

高海寧表示,每個網上留言都會睇。(葉志明攝)

由偶像派演員變成演技派?她笑說:「唔敢當,其實呢啲說話唔係我話嘅,而係觀眾去決定,但係我會盡我最大能力去做好每個角色。」看畢高海寧那一場喊戲的演出,一定會覺得她演技進步了。她解釋道:「可能係個人大咗,感受又會深啲,同埋演得越多劇,慢慢會識得咩叫融入角色,真係一個經歷,亦都係進步、蛻變。拍劇唔再係演個角色,而係做嗰個人。」

呢一幕戲好令人感動。(《金宵大廈》劇照 / TVB)

「蛻變」之後,會否繼續肯做「花瓶」賣弄性感?她回答說:「好多人會諗:係女仔都知點去誘惑男仔啦,其實做一啲誘惑性、女人味嘅角色係更加難。因為做一啲調情、Sexy嘅戲,係需要放開自己,唔好諗身邊嘅人點睇自己,投入咗先演到,係好高難度。」

高海寧:「唔係個個劇本都做到,但係當你遇到啱嘅劇本,你會發揮得好好。」(葉志明攝)