曾醒明憶述人生最大敗仗 「公關一哥」認愧對楊思琦:好內疚!

撰文:吳子生
出版:更新:

前無綫企業傳訊部宣傳科副總監曾醒明今日(30/3)以嘉賓身份,接受葉家寶和黃守東主持的面包台訪談節目《公關與你》訪問。曾醒明與葉家寶二人相識已逾三十多年,兩人過去亦有不少趣事。歷屆港姐大騷一向有保證收視,不過2001年港姐決賽卻滑鐵盧,收視竟然跌至21點,敗給當晚獲39點、由陳啟泰主持的亞視《百萬富翁》,流失超過65萬名觀眾,成為曾醒明一生憾事,事後並引咎辭去港姐籌備委員會所有職務。

2001年港姐收視慘敗給亞視王牌節目《百萬富翁》後,曾醒明引咎辭去港姐籌委會相關職務。(陳順禎攝)

曾醒明接受《香港01》訪問大嘆唏噓:「好深刻記得當年巴士車廂中有個平台叫做RoadShow,因為每日都有大量乘客透過呢個平台接收唔同資訊,於是我就向籌委會提出將招募參選港姐宣傳片放喺呢個平台播,籌委會最終通過咗,報名參選反應相當熱鬧。」不過事後無綫高層認為手法涉嫌違反公司政策,所以計劃被迫煞停。

歷屆港姐收視一路所向披靡,但2001年港姐決賽當晚收視大跌,成為曾醒明人生中的一個憾事。(陳順禎攝)

相反亞視知道無綫與RoadShow取消合作後,亞視見大好良機當前,於是傾力反撲在RoadShow平台大買廣告,為王牌節目《百萬富翁》宣傳造勢。曾醒明坦言:「我知道每日巴士都會播嘢,有時候我搭巴士嘅時候,都睇到乘客嘅反應,嗰陣時我就心中不妙,但到01年港姐決賽當晚,我真係諗唔到,竟然會輸咗畀亞視嘅《百萬富翁》,相差60幾萬觀眾,我哋只係得21點,嗰次真係好難忘,嗰年冠軍係楊思琦,所以每次見到佢,我都會感到挫折同內疚,令到成個港姐決賽收視結果滑鐵盧,其實我好相信當年如果可以繼續喺RoadShow度播香港小姐,我哋係唔會輸,其實呢件事對我嚟講係好遺憾。」

曾醒明認為當年如果能夠在巴士車廂平台為港姐競選宣傳造勢,港姐收視一定不會敗給亞視。(陳順禎攝)
+3