圈中有著名的「兄弟幫」兼「愛妻號」馬國明、蕭正楠同曹永廉，繼早前合體在佛山開騷大受歡迎之後，他們宣布將於7月4日進軍惠州，舉行《三生有幸演唱會》。近日，他們社交平台發佈了演唱會宣傳短片，片中阿蕭盡顯「大牌」本色，結果被馬明同阿廉用一招「絕殺」制服，笑翻全網。

蕭正楠傲慢拒同台自封「單飛最靚仔」

宣傳短片中，馬國明同曹永廉齊齊向蕭正楠「下跪」般哀求，求一齊去惠州開演唱會。怎料剛做完個人音樂會、自信心爆棚的阿蕭竟然擺出一副高傲姿態，一口拒絕：「啱啱先自己做完（音樂會），我唔想同人做呀！啲人話我一個人喺舞台上面嘅時候特別靚仔、唱歌特別好聽、跳舞特別好睇，我先至唔同你哋做啊！」見到蕭正楠「勁得瑟」，老友阿廉隨即使出絕招：「你最驚老婆，我就話畀翠如聽！」

被當眾踢爆「驚老婆」的阿蕭依然口硬，反駁話自己怎麼會驚老婆。馬國明則神助攻，落井下石：「我要話畀我（湯洛雯）同佢（阿廉老婆姜依蘭）嘅老婆聽！」