有「三億千金」之稱的張寶兒（Bowie）與「雙料視帝」袁偉豪在2017年因合作拍攝TVB真人騷節目《打工捱世界II》而結緣，兩人於2020年結婚，婚後育有兩子「袁咕碌」及「袁氹氹」，一家四口住入6500萬豪宅，生活幸福美滿。早前張寶兒分享疑因樓上廁所渠裂，導致屋企「漏屎水」，甚至令電視機跳Fuse（保險絲），幸而問題得解決。張寶兒近日又曬出豪宅內部，即使身為千金小姐的張寶兒都要親自為豪宅打掃，十分貼地！

張寶兒曬半億豪宅勁闊落

張寶兒日前在社交網分享打掃豪宅的片段。張寶兒解釋，由於當日幫手打掃的阿姨放假，張寶兒用了兩小時清潔全屋。張寶兒先曬出家中裝潢，豪宅以暖色為基調，簡約又大氣，充滿溫馨的感覺。豪宅空間闊落，出面亦有一個私人花園，張寶兒將衣服放在花園晾乾，又有地方讓小朋友活動，住得相當舒適。

張寶兒購買的是皮具梳化，她愛錫家具，小心翼翼地用滾筒和濕毛巾清潔梳化，又拍埋梳化抱枕的塵。張寶兒熨衫、跪在地下清潔地板，湊住兩個仔一腳踢，忙碌又充實。完成後她躺在梳化上，一臉滿足。