【麒麟金城武】新晉男神男女通殺 莫竣名：試過有男仔向我示愛！
男神和女神一向渴市，最近令一眾女性為之瘋狂的，一定是「麒麟一番戀」廣告的四眼鬍鬚仔，有女網友覺得他似金城武、有些覺得似高以翔…...眼神又似梁朝偉，甚至是三人混合體，總之就是靚仔。這位新晉男神，他叫莫竣名（Louis），不單止有男神外表，更是中文大學數學系畢業生，嗜好是拉小提琴，中五已考獲8級小提琴，Louis 2015年接受過雜誌訪問表示，自己鍾意在凌晨12點在宿舍拉小提琴，真係浪漫到殺死人，以為Louis是文靜的，妳又錯了，他是游泳健將，亦參加過中大水運會（但他的泳褲造型未找到…...不好意思）。
難得有這種貨色，當然要對他深入了解，原來他留到滿面鬍鬚只須一星期，他說：「嗰個廣告一、兩星期前拍，導演係我大學同學，佢叫我記住留鬚去Casting，其實我留鬚好快，一個星期就可以成面都係，做Model嗰陣啲客人都鍾意我成熟少少，其實我又冇咩所謂，基本上我朝早剃完、夜晚已經生返少少，我中學開始啲鬚都好密。（網友話你似金城武？）吓？過獎喇，冇得比，我覺得自己似鍾鎮濤多啲，同埋我好矮，我啲朋友好鬼高，我得172cm。」
可惜男神名草有主，他說：「我有女朋友喇，係中大同學嚟，拍咗兩年幾喇，我鍾意得意啲嘅女仔，我唔浪漫㗎，但都試過整卡畀女友，同埋送個卡通人物生日蛋糕俾佢，就咁咋。」這次廣告不單止女粉鍾意Louis，連男粉絲都情傾這位鬍鬚仔，連Louis自己都知，他說：「佢哋好似特別鍾情有鬚的，女仔向我示愛就唔記得，通常都係男仔，最記得小學時，有個男仔跟住我行好耐，我直頭走佬啦，但佢唔知邊個位彈出嚟，跟住兜口兜面同我講話鍾意我，跟住我話『下，我唔鍾意男仔。』之後我掉轉頭即刻走，因為小學唔識點處理，但其實我係鍾意女仔嘅。」
Louis今年24歲，年幾前在中大畢業，現在在一間商場的補習室為中小學生補習數學，不過Louis沒有講那間補習社，唉…...係好想找Louis瘋狂補習呀。