《詭探》駱振偉奪07年新秀金咪 踎英皇3年零收入：要問阿媽借錢
近日ViuTV劇集《詭探》話題性十足，當中飾演邵仲衡的手下「梳打」的駱振偉（Thor）都好搶鏡。你以為佢係新人，咁就錯啦，其實Thor已經入行10年，2007年參加《英皇新秀歌唱大賽》，仲勇奪金咪大獎，順理成章同英皇簽約！可惜工作量不似如期，在英皇3年未有太多工作，更試過要做part time幫補生計。
新秀冠軍做part time幫補
其實今年32歲的Thor都算好醒，因為參加新秀之前，曾在國泰做空少儲一筆五位數字嘅錢，「因為好鍾意演藝工作，所以決定試下博一鋪。而且讀大學期間曾到港台工作，識好多行內人，佢地同我講：『呢行唔易做同機會不多，好多時間都要捱。』」Thor直言在英皇期間有幾個月「身無分文」要做part time,，「暑假嘅時候行晒成條彌敦道逐間鋪換EPS啲廣告牌，當時完全唔敢同英皇講，驚影響佢地形象，但我真係冇錢!！」始終「炒散」唔係話有就有，Thor甚至要「攤大手板」問阿媽借錢，為報答阿媽救急扶危，他決定要同媽咪開聯名戶口，「我同佢講『我唔會畀家用㗎啦，以後賺嘅錢放落去你地自己去拎啦。』」
歌星夢碎，連做演員都欠機會
雖然Thor在英皇機會唔多，又無得唱歌，幸好他還有與以前港台同事聯絡，「佢地問我有有無興趣返去做，所以我就用partime身份返去，英皇都同意。剛巧港台有監製見到我，就俾機會我去Casting。」其後Thor都演出了港台多部劇集，反而在英皇只出演了一部電影。2010年，英皇主動與Thor解約，「經理人好坦白同我講：『你可以留係度，我唔介意嘅。但我地唔會比錢你地做歌。』」他直認當時心情好爭扎，「之後我有再問佢地，如果拍戲呢，佢地話：『你都唔會有好多機會。』個刻先死心。」
Thor直言當時的心情覺得自己有懷才不遇感覺，「嗰陣自己成分日轉牛角尖，自己好少講野，私下唔係善談嘅人，其實公司俾好多機會我都好感激，走左先知自己嘅不足，可能唱歌唔夠叻。」其後Thor透露辭左國泰份工之後，都有去演藝學院學唱歌同做戲。他特別感謝當時的教佢唱歌梁月玲老師，「當時係佢提名我去比賽，贏左比賽好似對自己同佢一個交代。」至於係咪夢想做歌手？Thor坦言當時嘅想法係參加新秀係最容易入行，「其實我係鍾意表演，唯有用我當時強項唱歌，所以就試下。」
家人女友支持繼續走演藝路
Thor非常感激當時家人和女友的支持，「當時我唔太識處理情緒，覺得自己好寂寞，放自己埋一邊。女朋友覺得我好似有情緒病，因為嗰陣我好似癲左，好想證明自己係識做戲，無端端係屋企會同自己試戲，變得情緒好唔穩定。」幸好女友好體諒Thor，「始終呢行同其他行業好唔同，唔開心同辛酸十都唔知點表達，佢聽完可能同我講一句加油，已經係最大安慰。」
2011年，Thor就加入Now做主持，去年更過到ViuTV繼續工作，除了主持工作還有在節目中唱歌，「自己都會玩下音樂，但唔會係呢方面花太多時間。」Thor透露前幾年有同朋友夾band，彈下吉他拍下唱歌片，突然就好感概咁話，「好唔好彩去到今年就開始散，個個band友去結婚生仔，又無時間又唔夾租，所以就放棄左。」