《大時代》重播後，回歸娛樂圈快兩年，雖然不時看到有關邵仲衡的消息，但就連他自己也覺得「好似無真正做過一件完整的事。」對於新作《詭探》，邵仲衡說題材不算新穎，但故事吸引、人腳夠正成了他入局的原因。「老實講，我重有幾多年可以做？我緊係咩都揀。」現時的「大佬孝」當然有得揀。

ViuTV的《詭探》播出自今，有回響但收視一般，邵仲衡就話現今科技發達，自己都未必會實時開電視追劇，用收視去定義好與壞，似乎有點不公平，但身為主角，應該享有知情權吧？「他們沒有告訴我收視多少，但feel到，大家交談時嘴角有微笑，你要知道他們屬於那個什麼集團旗下，好現實，得就得，唔得就返屋企。」雖然早已知道每集只得30分鐘，但當看到成果時，觀眾都不禁彈出「真係咁？」之疑問。「最近才睇完《GOTHAM》第三季，30分鐘一集，甚至之前的《三一如三》、《瑪嘉烈與大衛》也只有30分鐘，為什麼大家都唔講？可能《詭探》太有連貫性。大家始終在TVB模式下長大，有肌肉記憶。」孝哥笑一笑，其實外國好多劇又真係得30分鐘。

重返娛圈是社會實驗？

結果不似預期確是可惜，但能夠與車保羅、尹揚明、張雷、白彪等人交手，加上製作團隊給予的自由度，塑造了一個有肚佬兼鬍鬚兀突的茅山師傅「司馬至全」，對邵仲衡來說，滿足之餘，也證明自己冇揀錯。「我其實開心，亦都試驗緊出返嚟之後，言行是否同一般架上的相同。不少人認為我敢言，甚至係亂噏，但我其實是用另一種方式去approach這行業，背後有根有據，因為過去20年，我在商業社會上面對了不同的人和事，他們的節奏與呼吸就是這樣。除非你偏視、偏聽，否則好易get到社會的訊息，做人做事最舒服的方式，是與社會呼吸一致。」一句講晒：貼地。

有得揀最重要

在無線的日子，邵仲衡高峰期試過5年20套劇，原本大好前途卻選擇了從商，金融風暴、信貸危機、公司孭鑊通通遇上，但他依然樂觀面對，不過貪新鮮又貪刺激的個性，令他上了寶貴一課：「玩股票我最初只重結果是輸是贏，但過程中輸贏幾多我唔mind，那種心態很錯……」邵仲衡說自己並非順風順水，但相信只限於從商部分。看他幕前的事業便知，《大時代》重播，令他人氣如坐火箭，有份參演的電影《紀念日》票房過千萬，再一套《詭探》，就算有實力，都總要有點運氣吧？「老實講，我重有幾多年可以做？我緊係咩都揀，揀到自己想做，唔會聽別人意見，用自己的經驗去判斷，了解如何去entertain別人同自己。」

他曾為了entertain自己，由香港開車到北京……家人會明白他這種玩法嗎？邵仲衡說太太是圈外人，當然會有疑問，但未曾反對過，他亦會細心地解釋。「她很清楚我為人，知道我好目標為本，就算在國內做生意，她也不曾擔心，每個人都有私隱，我唔敢講話冇嘢唔比得佢知，但大家一定要尊重，尊重就是最好的解釋。」

邵仲衡有兩名兒子，分別14及13歲，自幼在英國升學，成長地方不同，再加上兒子慢慢長大，他表示都要技術性調整父子關係，但最重要還是尊重雙方的私隱。「唔需要任何guideline，佢兩個唔走去食白粉就得， 或者唔好搞到愛滋病就得啦。」在社交網絡年代，不少父母都希望透過社交媒體留意子女，但亦有不少子女拒絕與父母成為fb之友，邵仲衡說自己幸運地依然「on list」，孝哥教仔果然有一手。