日系手機賺第一桶金 「先達小炒王」兩兄弟孖住上 自爆揸7層樓

撰文:陳嘉碧 林樂謙
出版:更新:

香港人「愛炒」,上至炒樓、炒股,下至炒波鞋、月餅,無一不歡!早幾年,幾乎人人炒iPhone,更令旺角先達廣場風光一時。今日蘋果光環褪色,但先達這塊淘金地,已帶起不少英雄好漢。
其中,人稱「先達小炒王」、數碼匯店主葉毅勇﹙「勇哥」﹚,與哥哥紮根先達13年,兩兄弟孖住上,由擺街檔做到經營2間手機舖,年搵200萬元!早在蘋果熱炒之前,已靠買賣手機炒出人生第一層樓。
兩兄弟一路以來將炒賣所得,投放於「磚頭」上,更自爆擁有7層樓,勇哥輕描淡寫道︰「無諗過買樓翻到咁多倍,只係想起碼有得住!」

先達為本港第一代「劏場」,場內店舖面積細細,超過200間店都經營手機電訊等相關行業。(林若勤攝)

記者走進先達,入面有逾200間舖做手機買賣生意,繞來繞去都是大同小異的手機舖,直至拐進一樓的一個轉角,赫然發現一間酒舖,專賣蘇格蘭和日本威士忌。向店內伙記打聽老闆是何方神聖,只見他向旁邊的手機店招一招手,一名身穿衛衣的年輕人旋即朝記者方向走來。

不要看他年紀輕輕,原來已在先達打滾10多年,人稱「先達小炒王」,  打理2家手機店,2017年iPhone X推出時,更向傳媒大曬900萬元現金,作收貨之用,成為一時熱話。

創業成本15萬元

「先達小炒王」真名葉毅勇,現年32歲,自言「細個屋企都好窮,都係住公屋」。當初,他哥哥葉毅堅跟舅父在觀塘做手機買賣,工作兩年後﹙2005年﹚,哥哥就和拍擋出來闖,更叫剛中五畢業的他做「廉價勞工」,由月薪3千元做起。

創業成本不高僅15萬元,但已是兄弟二人及拍擋的全部儲蓄,第一間「店」是油麻地彌敦道一間茶餐廳門前租用攤檔買賣手機,月租5,000元。10個月後,他們儲到約30萬元,成功進駐先達廣場1樓,開始了在先達賣手機的歲月。

勇哥不僅在先達廣場經營兩間手機店,去年底更多租下2個舖面,專營洋酒買賣。(林若勤攝)

賣日本手機 賺第一桶金

「前iPhone」時代,先達已是出名的手機集散地,機會處處。葉毅勇回憶道,那時候港人追求日版手機外觀靚、影相夠好,但日本水貨手機往往有上鎖,以防流出日本,港人就千方百計破解。如由Vodafone代理的擁320萬像素、2倍光學變焦鏡頭的SHARP 903SH,可謂是當時人氣王,炒價非常熾熱,更帶起日本品牌Sharp﹙聲寶﹚、Toshiba﹙東芝﹚等到香港推銷行貨。故在搬入先達1年後,日版手機熱潮,已令他們再多租同層一間門店。「個時(買賣手機)最多搵到幾十萬,第一桶金(100萬元)係日本手機到搵!」 

當中致勝關鍵是「貨源」,他話當時日本手機開始興起,網上有人向其放一部日本手機。葉毅勇於是順口問多句,有更多貨也會收,機緣巧合下靠著該名放機人的門路入貨,引入日本水貨手機,搶飲頭啖湯,甚至同行也向他拎貨,「(日本機)定價是由你定,好多二手電話賣賺200至400元,新(手機)嘅賺100至200元,但賣日本機賺500至1,000元。」

不過,在日本機上賺到第一桶金,後來亦因蘋果的手機「革命」,令到他蝕足1球貨。蘋果於2007年推出第一代iPhone,首次摒棄物理鍵盤,推出全觸摸屏,令到日本機生意一落千丈,雪上加霜的是日本手機設有預設「鎖卡」(SIM Lock),限定機主只能特定電訊商的Sim卡,過往的破解方法失效,慘蝕約100萬元的貨物,淪為倉底貨,「有啲送左比人做模型,有啲好平2、3百蚊賣畀人,有啲仲擺係到!」

2017年時蘋果推出iPhone X,不少先達店主積極收機。(資料圖片)

細數歷代蘋果手機 iPhone 4 最好賺

事實上,iPhone的面世,改變人類溝通方式,亦改寫了先達面貌。雖然現時iPhone吸引力或大打折扣,但回顧歷代蘋果手機,葉毅勇仍津津樂道。他表示,當時由iPhone 3GS到 iPhone 6S 期間都好生意,最好賣的時候是炒iPhone 4,最高峰當月賺200萬元。自己亦在那時候,借勢在先達多租一個舖位,把原來店面擴大。

可以話,葉毅勇在先達都是資深「炒友」,但講到2017年,蘋果推出iPhone X,就令他失預算。當時他在接受本地傳媒訪問時拿出一筴900萬元現金,用作開售當日收貨之用。他稱900萬元的現金是多年所得和儲蓄得來,首日有錢賺,但之後幾日蝕好少,拉勻仍然有賺,但只有上一代手機盈利的3至4成。

隨著蘋果風潮減退,2間舖生意亦漸漸下滑,葉毅勇透露,現時一年賺約200萬元,平均月賺約十多萬元,當中3至4成來自買賣手機,約3至4成為手機和配件等出口批發業務,餘下2成則為手機維修等生意。他認為,市場雖然收縮了,但只是「賺少咗」,「(手機市場)係有跌到,但其實咁多年都差唔多,依家係少啲,點解啲人以前覺得好做好搵,係因為iPhone,平時生意好普通,但有iPhone就會呯一聲,突然之間好好,假設佢每月搵5萬、但炒iPhone個個月可以賺到30、40萬」。

【先達直擊】iPhone失色 國產機借勢抬頭 過萬蚊華為月賣10部!

【先達直擊】Lo哥憶述元祖級劏場那些年 Sunday電訊攪局造就商機

葉毅堅(左)和葉毅勇(右)兩兄弟拍住上十多年,不僅在生意上同心協力,連買樓投資都拍住上。(林若勤攝)

「炒友」乜都炒 唯一買入無賣到就係樓

葉毅勇靠著炒賣賺到一桶金之後,成功上車,在2008年在旺角買了第一層樓自住,當時以110多萬元「full paid」購得300多呎的單位。在其後,和哥哥斷斷續續亦有入市,他話︰「儲到一定嘅額,就會買樓」。現在自己身上仍揹著2個物業的按揭,就和哥哥在香港共持有7個物業。

他也說以前無想過要靠買樓發達,創業初期時兩兄弟租住旺角套房,賺到錢後就想住得更好,「無諗過買樓翻到咁多倍,只係想起碼有得住!近幾年先覺得買樓可以搵錢,一開頭都係打算自住,之後先買第2間收租」。之所以一直只買入無賣出,葉毅勇直言:「見佢地每一年都升緊 ,都驚賣左佢買唔返,唯一一樣買返來無賣過嘅野就係物業」。

左邊數起首二支為羽生撲克牌威士忌的黑鬼和彩鬼,全套54支,全球只有122套。(林若勤攝)

賣威士忌「愈放愈有價值」

有樓在手,他和哥哥就開始涉足其他業務,如酒吧、餐廳等,「其實逢係炒賣的野,我地都有做啦」。最新搞作是去年9月,於先達廣場租了1樓2個舖位,專賣限量、特別版的威士忌、清酒等的門店「響」。他指,「電話你入100萬的貨,2年後你賣唔出,100萬的貨都唔知值唔值40萬,我入威士忌100萬,2年之後,起碼唔會少過100萬」。因見酒愈放愈有價值,故在經營手機業務時,已有向客戶賣酒,但此客戶群是有限的,自己就決定和哥哥、朋友夾份開設實體門店經營,「實體店一來多D人睇到,了解威士忌係點樣的」。

雖先達過往被視為「手機集中地」,但葉毅勇認為先達已開始慢慢轉型,而有一些不同的店舖,如賣酒、手錶等,都可以吸引其他人流。先達在旺角屹立25年,由繁華喧鬧走至今日門庭冷落,在此地不知有多少先達人的故事。對他而言也別有意義,「係呢度發跡,所以先唔想離開呢度,只要生意維持到基本生存都會繼續做!」