排公屋中「窮人版山頂景」 單位開揚遠望維港 網民讚:靚過豪宅
獲派有如山頂「靚景」的公屋單位,實在值得慶賀!有港男在網上群組發文,指獲派秀茂坪安達邨,上傳照片顯示單位景觀開揚、遠眺維多利亞港,並感恩稱「窮人版山頂景」,不少網民羨慕並送祝福,「公屋價錢,山頂景緻」、「人哋用幾億住山頂,你就2至3叉(兩三千蚊)住山頂,仲唔弗(fit)晒」。
不過有人認為安達邨交通不便,繁忙時間或「塞到爆」,另外由於地理位置較高,遇到「回南天」恐怕會相當潮濕,需要常開抽濕機。而樓主則表示已考慮以上缺點,但仍然覺得滿足,「最主要都係我唔想再博下一次」。
公屋一般申請者最新「綜合輪候時間」為4.8年
根據房屋局網頁,截至2026年6月底,過去12個月獲安排入住傳統出租公屋,或「簡約公屋」的一般申請者的「公屋綜合輪候時間」為4.8年,雖然較上一季輕微上升0.1年,但仍低於2018年至2025年間的紀錄,繼續維持在5年以下。
獲派安達邨高層單位 景觀開揚遠望維多利亞港
該港男在facebook群組「公屋討論區」發帖,表示獲派觀塘秀茂坪的安達邨,目前已「攞匙」收樓。從他拍攝照片估計為高層單位,景觀開揚且居高臨下,下方雖然為密集式樓宇,但遠眺維多利亞港以及九龍市區景觀,仿如置身半山豪宅的地段,樓主因此自嘲:
我窮人版山頂景
網民羨慕激讚單位景觀:靚過好多豪宅
不少網民紛紛留言為樓主送上祝福,「大地在我腳下」、「嘩,煙花景喎」、「有埋個海景」、「夜景應該靚」、「心曠神怡」、「公屋價錢,山頂景緻」、「人生勝利組」、「恭喜你安居樂業」。
人哋用幾億住山頂,你就用2至3叉住山頂,仲唔弗晒
交通不便+易受潮濕天影響 網民:要接受有利有弊
但不乏留言指安達邨交通不便,以及容易受潮濕問題影響,
「交通唔方便係死症,有車揸都有排塞」
「返工返學會麻煩」
「之前喺秀茂坪做過一排嘢,交通唔方便,某啲季節大霧到望上山成個安達邨唔見咗」
「曾經住過8年安達邨,真係好潮濕,春天走廊地下全部都係水」
「我首派都係呢度,咁啱上去睇單位嗰日,回南天又大霧,走廊已濕,單位鐵閘由上而下係咁滴水,都幾嚇人,後尾都冇要」
不過有意見覺得要接受有利有弊,「其實全香港都好潮濕㗎,但係靚景就唔係度度有」,而樓主亦表示已考慮以上缺點,但仍然對於編配感滿意,「最主要都係我唔想再博下一次」、「景靚係意外收穫」,他亦已預計未來要預早出門上班,以避開人多塞車問題。
依賴巴士小巴接駁 繁忙時間易擠塞 需預留額外時間
安達邨於2016年入伙,雖然屋邨位處半山,但交通其實尚算方便。在安達商場對出設有巴士站,居民可以依賴巴士和專線小巴接駁至港鐵站及各區,惟繁忙時間主要幹道(如秀茂坪道)容易出現交通擠塞,搭乘交通工具下山轉乘需要預留額外時間。