【有心唔怕遲】籌備25年 67歲滷味師傅終達成創業夢

撰文:文皓心 周詠雯
出版:更新:

為夢想,你可以去到幾盡?67歲的榮叔,從養老金抽出一部分,前年年底開店,一圓25年來的夢。老來創業,既不簡單,又很浪漫。

榮叔一圓25年夢想,前年年底開了一間滷味店。(周詠雯攝)

個多月前,將軍澳一間街坊滷味店被騙徒假意訂貨、騙走千元現金,因此預製的多隻雞鵝,最後由熱心網友和街坊認購,才不致白白浪費。「三唔識七」就借錢給他人,老闆是太多錢,還是太好騙?

特意為老人家調校滷水鹹度

記者到訪寶琳街市內的「滷香居」,架上掛着一隻隻色澤光鮮豉油雞及滷水鴨鵝,一滴滴蜜糖從雞滑下,混和着桌上肥美雞翼。身穿白色廚師服的老闆林錦榮在店內一把抓起肥雞,手起刀落,仔細割去雞翼鋒利尖端、斬走雞殼長骨,挑走大塊油膏,轉眼便把肥雞分成一件件。榮叔解釋,「𠵱家啲人追求健康,唔想食咁油」,所以若非顧客事前要求,榮叔會自動將肥膏挑走。榮叔也注意到附近街坊以老人家為主,所以故意調校滷水味道,「啲人多數上咗年紀,畀得鹹啲唔係咁啱,要清(淡)少少」。

自家製豉油雞髀,屬最好賣的食物之一。(周詠雯攝)
滷香居位於將軍澳寶琳街市,榮叔指生意難做,其中一個原因是區內街坊不少都是長者,「食唔到幾多」。(周詠雯攝)

客人大讚食物值99分

街坊小店最讓人窩心是一份人情味,榮叔總會提醒客人離去時留意梯級,又記得熟客們喜好以至家庭狀況,就連客人的岳母一家都能認出,難怪滷味店開業不久即有一群忠實顧客,有人十日光顧七、八次,有人會在傍晚關店前幫榮叔「清倉」。有客人大讚榮叔出品值99分,有人特意製作小飾物送到店上。小店雖然不能賺大錢,但榮叔笑說:「唔蝕就ok㗎喇。」

榮叔跟街坊關係甚好,楊小姐更自製小飾物送給榮叔。(周詠雯攝)

賺不了大錢,或許跟經常「半賣半送」給人有關。例如價錢牌上寫20元7隻雞翼,榮叔每次總夾8隻給客人;有人要買豉油雞,付錢一刻才知道身上只有90元,欠8元,榮叔會說「嗰幾蚊由得佢啦」;熟客買了雞及鵝頸,他又半賣送對方家人喜愛鴨舌;有人不夠錢買豬手,他竟叫「你下次順便經過、記得嘅咪嚟還囉」。

小妹妹買了雞翼,對著記者露出笑容。(周詠雯攝)

上月被騙千元 竟為騙徒說好話

談起上月被騙,榮叔劈頭就說:「其實都唔係佢呃晒嘅,係我太老實啫。」街坊為他抱不平,指騙徒沒良心,榮叔反而為騙徒說好話,「可能係佢唔記得咗」。人生處世,榮叔但求「過得自己」,他有一句說話很喜歡:「奉獻不拘,回報不求。」幫人為求心安理得,並非要求回報,他自言「唔會呃呃騙騙,自己就唔會呃人啦,人呃我就有啫,哈哈哈」。豁達如他,對被騙一事毫不介懷,只希望記者傳揚信息,呼籲該騙徒改邪歸正。

67歲創業 只因夢想已在心底25年

年近古稀才來創業,只因心底有個夢。1990年,榮叔42歲,對廚藝略有心得,想開個店試試自己的能力。在念頭萌芽之時,他毅然辭去燒味部主管一職,月薪萬多元驟降至數千元,就是為了走進酒樓熱廚房,從最底層做起——清潔爐頭、洗刷用具,以了解廚房運作,為日後自己開店「做功課」。「做最細嗰位,自己走動(機會)大吖嘛,冇咁多嘢做,咁咪有時間去睇人囉,就算埋爐頭都有機會吖嘛。」不嫌地位低微,將每項功夫都視為踏近夢想的一步。榮叔憶述當時向酒樓多個部門師傅偷師,「嗰時我都好勤力,經常去問點心師傅,令自己盡量熟識個運作。整西餅我都有去睇人做,整西餅嗰啲好早㗎,自己咪早啲返到去睇吓佢點樣做法,由打蛋呀麵粉呀,到點樣焗。自己心目中想每樣都知道啲」。追夢的人,雖然辛苦,但幸福。

力讚滷味店榮叔是好榜樣 胡官:一定要試試他的出品

榮叔指自己斬法跟燒臘師傅不同,食物會較細件、企理。(周詠雯攝)

榮叔心願到67歲終於實現,「其實好早已經有部署,點知又話啲牌(食物製造廠牌照)好難出,所以掉吓掉吓冇做得成」。榮叔一度物色到鴨脷洲開店,認真登記該處來往人次,「(當時)啲細路仲讀緊書,個女帶埋男朋友去利東邨睇吓有幾多人流,啲人仲以為佢係食環署」。籌備多年,及至榮叔三個子女均讀畢學士、碩士,不再愁生活,榮叔因而將夢想收進貯物箱。直至年多前,榮叔看報紙得悉或有機會接手寶琳街市店舖,又心思思想實現夢想。

榮嬸:都佢唔知為乜,攞苦嚟辛!

為了開店,榮叔「自己寫招牌,自己買油漆」,曾在勸阻行列的榮嬸說:「我話佢,你諗過喎,生意旺你又瞓唔着,冇生意你又瞓唔着。你個人責任心咁強。」但見他態度堅決,榮嬸就不再反對,「有時都話佢唔知為乜,真係攞苦嚟辛呀佢。哈哈」。榮嬸看着丈夫,雖有取笑之意,但她一直在旁幫忙,卻是對榮叔最大的支持。

雖然指榮叔「攞苦嚟辛」,榮嬸每天都到店裏幫忙。(周詠雯攝)

一份堅持,感動家裏所有人。榮嬸每天送孫兒上學後就會到店裏幫忙,又學揸刀斬雞。榮叔也說,開店團結了一家人,「不論大大細細,一齊共同努力,聚會嘅時間仲多咗。禮拜六、日、假期啲細路又會嚟玩呀嚟食呀,好開心㗎」,就連滷香居的facebook專頁,也是由兒子包辦,一家人眾志成成,就是為了替榮叔償願。

榮叔:此生無憾

滷香居租約為期兩年半,約滿榮叔就會退休,「對我哋咁嘅年紀,兩年幾嘅時間都ok㗎喇,再做自己個精力都未必咁理想。都要畀返啲時間自己輕鬆吓,正式停落嚟享受一吓晚年」。大概超逾花甲之齡,世事也只能在乎曾經擁有。記者問他是否此生無憾,榮叔笑咪咪說:「係呀。能夠開店,日後就有個美好回憶。」

榮叔下年年中便會正式退休。(周詠雯攝)

滷香居
地址:將軍澳寶琳街市PL93舖
電話:9086 8917