【我不怕唱歌】TVB開心果拍劇唱歌都得?麥美恩錯重點:身材好靚

撰文:史順宜
出版:更新:

J.Arie:我知你故意唔影面部,因為好易認!
麥美恩:佢鎖骨好正!
KOL科林:佢係黑妹!
其實佢真係咁難估咩?
攝影:黃國立 史順宜
剪接:許栢倫

一個全職歌手要喺香港單純靠唱歌搵到食真係唔算多,所以有唔少嘅歌手都要多才多藝,務求可以多方面發展刷一刷存在感。例如入電視台拍劇,拍電影或做主持等。當然哩啲機會唔係你想有就有,都要睇際遇及你嘅才能,畢竟機會係留畀有準備嘅人。入番正題,《我不怕唱歌》今次搵嚟嘅哩位朋友,佢當初係以組合身分而出道,出道第一首歌曲到現時為止已經錄得過百萬點撃。近年以個人名義出歌嘅佢,除了唱歌,作曲及填詞外,拍劇及主持電視節目令佢形象非常入屋。哩位傻大姐每次畀人嘅感覺都係一粒可愛嘅開心果,佢嘅演出都帶畀人一種充滿陽光嘅感覺。大家又估唔估到佢係邊個呢?

開估喇,哩位歌手就係糖妹!今次佢翻唱林奕匡(Phil)嘅《高山低谷》原來有段故:「我唱《高山低谷》係因為Phil同我都係同期新人(2010年),嚟緊我同佢有音樂上嘅合作,同埋我覺得高山低谷係人生必經階段,所以好有共鳴。我覺得哩首歌紅係有原因,因為《高山低谷》幾時唱都令人好有感覺。」

黃山怡(糖妹)在2007年與潘雲峰(糖兄)組成二人組合「糖兄妹」。並於2009年喺台灣錄製第一張專輯《我最愛糖兄妹》,在2010年正式出道。當年出道作品《我最愛糖》更成為佢哋嘅代表作,而且《我最愛糖》MV在網絡點撃更突破百萬,唱歌實力有目共睹。除咗音樂上得到各大頒獎禮認同外,糖妹喺演藝事業都有唔錯際遇,拍劇,主持樣樣掂,久而久之形象入哂屋,係大家眼中嘅開心果。

糖妹一向給人的感覺都是一名開心果。(黃國立攝)

眼見糖妹喺演藝圈條路行得唔錯,又多電視台工作嘅機會,每年都可以創作並推出自己喜歡嘅音樂,其實以歌手嚟講佢算係好幸福,起碼大家會覺得佢搵唔少。雖然係咁,糖妹都非常慳,有時出活動都係搭公共交通工具,原來糖妹慳錢係要供海外留學嘅細佬讀書!

糖妹笑言:「財不可露眼呀嘛,我覺得一個女仔一定要有自己積蓄,所以我一入行第一件事就係問公司借錢買保險,因為覺得爸爸媽媽年紀開始大,而我哩份工收入唔穩定,所以我就幫佢哋買保險保障佢哋,我唔係賣廣告,不過我真係好care屋企人,至於細佬去外國讀書,作為姐姐係有責任供書教學,所以唔理佢哋貧窮定富貴我都要盡自己責任去照顧佢哋。至於我慳,其實我覺得生活就係咁嫁啦,應該搭地鐵嘅時候搭地鐵,真係趕時間嘅時候先坐的士。但你問到我生活慳唔慳,其實屋企人一路嘅教育都係應駛得駛。」

糖妹謙稱星途順利跟運氣及際遇有關。(黃國立攝)

談到糖妹入行到依家工作不斷,有歌出,有電視劇拍,星途都好順嘅時候,糖妹謙虛表示自己嘅運氣唔錯:「彩數就一定有嘅,因為出道嘅時候電視台係需要人,令到我多機會亮相,我哋(糖兄妹)一開始玩國語甚至有人以為糖兄妹係台灣組合,所以當時關注都比較多,不過電視台會唔會畀機會你,就要睇你識唔識捉緊機會去表現自己,人哋先會多啲用你,所以我覺得阿聰(張繼聰)真係好叻,佢係一個超級學習對象。」

糖妹影相好多Pose,好識搞氣氛!睇相就會明。
+17

糖妹最近宣傳新歌《陽光小姐》,佢表示哩首歌其實係佢本人寫照:「《陽光小姐》係講一個開心果永遠都係為人而活,卻往往被忽略,而且缺乏其他人關心的一首歌。唔知大家有無發現每個圈子都會有一個人係會擔當住開心果嘅角色,佢會識得係朋友面前搞氣氛,識得幫朋友解決好多問題,好似永遠都係一個可以畀你訴苦嘅樹窿咁。大家有無諗過其實嗰一位開心果都會同其他人一樣唔開心,都會有情緒受影響嘅時候。其實哩位開心果先係最缺乏人去關心嘅一個人!」

其實糖妹真係一個傻大姐!(黃國立攝)

糖妹續說:「填詞人林若寧填咗《陽光小姐》出嚟嘅時候,我覺得自己係可以代表到歌詞所表達嘅哩類人。特別係我做藝人哩個工作,哩個工作令我有時都會自己呃自己,要自己無時無刻都要笑臉迎人,而《陽光小姐》想講嘅嘅另一樣嘢就係,成長過程入面其中一個最大挑戰,就係要面對自己同埋認識自己。今次林若寧可以寫到《陽光小姐》都要拜新碟監製舒文所賜,因為舒文真係好了解我,所以佢聽完我作嘅曲之後,佢再幫我分析哩首歌適合表達糖妹邊一方面嘅性格。舒文好識得用歌曲治療唱嘅歌手,咁樣可以令到歌手唱得更加好。我雖然成日都喺其他人面前扮演一個開開心心嘅人,但我都好興幸我身邊都有幾個可以扮演到樹窿角色嘅人出現,而我自己本身都係一種遇到唔開心會不斷尋求方法去解決嘅人,所以對哩方面嘅問題都handle得幾好。」