【星挑細選】譚嘉儀的分手悲情歌 假如讓我說下去還有說話未曾講

撰文:陳奕熙
出版:更新:

愛情嘅嘢好簡單,「合則來,不合則去」,但去到分手一刻,有時真的想放開都放不開,「病徵」重則以淚洗面一年半載,輕則愁眉苦臉兩三天。好在!我們身邊有廣東歌陪伴着,香港人得天獨厚的K歌,十居其九都是情歌,句句歌詞都唱着凡人心,你唔覺得你傷心時聽的歌,每一句都像是自己的心聲嗎?《眼眼紅》唱了15年「我最初面紅/現在雙眼通紅/再幼稚還是覺得戀愛如夢」,形容熱戀和分手的落差還是如此貼切。

音樂是一種語言,它同時是一種藥,可以治癒人心。(符祥定攝)

新晉唱作歌手譚嘉儀(Kayee,其實唔新,但卻是出爐新人獎)近期推出的《扯線木偶》和《最後也分開》就分別形容了苦戀和分手的故事。兩首歌均是Kayee和哥哥親自創作,在寫《最》的時候,Kayee就在歌中投入了過去的回憶:「分手重遊舊地,或者見到舊物都會想起對方,聽這首歌會想起過去回憶,感覺是很灰,但聽完卻會有舒緩、釋懷嘅感覺,分手時當然會好想對方知自己嘅感覺,但回望過去時亦會知道自己上了很好嘅一課。」

《最後也分開》 譚嘉儀​

「愛一個上多一課/自由也不錯」的大道理個個都懂,之不過就是放不下嘛,凌晨夜裡失眠望天光,又有誰可以打救自己呢?Kayee的醫療方法就是聽《假如讓我說下去》:「平時分手、唔開心都會聽,歌詞有講好想對方聽電話,再和對方傾心事,有種好想對方仍然喺我身邊同我傾訴嘅感覺,但其實對方可能已經搵咗另一個,已經唔再鐘意自己,我覺得臨瞓失眠時聽特別到肉。」

《假如讓我說下去》 楊千嬅

可惜有時候就是欲言又止,《情深說話未曾講》就最能代表Kayee過去的一段遠距離戀愛:「嗰時啱啱分手就會覺得依個人好遙遠,有啲說話未同佢講完,分手分得好唔開心、好無奈。」Kayee坦言每次唱都會唱到喊,唱英文版的時候也會很感觸。

《情深說話未曾講》 黎明

《到此為止》是一場比較激昂的懷念,因為年紀小無理取鬧而感到後悔,但醒覺時對方的心思已不在自己身上,「歌詞道出咗你依家已經有新嘅女朋友,但我仍然想起以前同你通宵傾電話,不過歌最尾有講要將感情棄置,再好好過日子,所以我覺得係一個勵志結局,將分手個痛楚寫得好細緻。」

《到此為止》 連詩雅

直到人大了、成熟了,就開始學會在感情上忍讓,分手沒有再嗌生嗌死,也終於明了甚麼是「因了解而分開」,就像《今夜煙花燦爛》在平淡中流露出可惜:「係一種想同自己講,我知我哋即將要分開都想享受埋最後今晚。今晚盡最後一刻跳返隻舞,盡最大努力去演好自己係對方好好嘅情人,有少少自己呃自己的感覺。」

《今夜煙花燦爛》 吳雨霏

這是Kayee的分手情歌,你呢?(符祥定攝)