【蚊患加鼠患】等車如餵蚊 老鼠似貓咁大 馬鞍山屋苑爆衞生問題

撰文:李穎霖
出版:更新:

夏天為大地帶來雨水之餘,又是蛇蟲鼠蟻出動的時候。沙田區區議員丁仕元表示,近日不少馬鞍山錦英苑街坊都投訴,指屋苑內蚊患嚴重:「尤其係等車嘅時候,有好多蚊同蠓,會咬腳。」蚊患未絕,屋苑內更出現鼠患問題,令居民相當困擾。

丁仕元指屋苑衞生情況欠佳,其中一個原因是和屋苑的商場有關:「佢個清潔狀況每況愈下,商場成日解釋話資源好緊拙。」他認為管理公司或未有每日定期清潔,以致衞生環境欠佳,他又指有居民曾在商場範圍見過「貓咁大隻」的老鼠,沿着花槽走入商場,於食肆和街市範圍遊走,情況令人擔心。

沙田區區議員丁仕元(黑衫者)日前就馬鞍山錦英苑蚊患及鼠患問題,相約食環署職員視察。(沙田區區議員丁仕元提供)
丁仕元指自己在巡視期間亦被蚊叮了幾下,可見問題嚴重。(沙田區區議員丁仕元提供)

屋苑商場已售予私人公司,已非公眾地方,但丁仕元約食環署衞生總監及衞生督察到場視察:「食環嚟睇過之後話會畀壓力商場,要求佢哋改善,如果唔係就會出告票。」現時正值盛夏,他亦擔心問題不盡快解決,會令傳播登革熱和日本腦炎等疾病的風險增加,故希望商場能於一個星期內改善問題。

近來連場大雨,令屋苑內的積水問題加劇。(沙田區區議員丁仕元提供)

除了商場,屋苑內亦有積水問題:「近排雨水多,所以都有啲積水,坑渠啲水都停住、積住咗喺度,好容易滋生蚊蟲。」丁仕元亦指,屋苑行人通道上蓋亦有相同問題,由於落葉塞住去水口,令積聚了的雨水無法排走:「佢哋(管理公司)話啲葉自己會分解,會變返養分畀泥土,但個問題係佢分解都要時間!」他表示會要求管理公司加強清理。