【低壓槽】張家輝導上癮 警匪新作搵埋Kelvin爸「甘樹培」客串
撰文：許育民
出版：更新：
張家輝繼《盂蘭神功》及《陀地驅魔人》後，上年已默默進行三度自導自演作品《低壓槽》，並已經完成，早在年頭的影視博覽出過首條預告，那份劇力已深深體會到。
今日再有新預告兼製作花絮首度曝光，今次家輝唔再走驚憟題材，反而專攻動作爆破，既自己參與調度，兼親身上陣，似乎這套年底上畫的新作，大家要留名等睇。
前兩部都是靈異鬼片，今次重回港片強項警匪，但家輝強調交到他手上，絕對會有新視點，是非一般的警匪作。（影片截圖）
戲中有跳傘情節，不過是後期CG加工。（影片截圖）
從預告片所見，家輝在現場非常認真，每個場面調度都要非常清楚，縱有動作指導參與，他都從旁給予意見，顯得十分緊張。而戲中連場驚險鏡頭，家輝都堅持親身上陣，拍完又急急返到鏡頭後睇Play Back，每樣都執到最四正先收貨，絕不欺場。電影拍攝了3個月，所以張家輝一個破格的捲髮造型，都Keep足3個月，亦因為這個造型，令觀眾有種陰沉、懸疑感覺。
戲中有大量動作場面，家輝每個都要掌握得非常準繩。（影片截圖）
元華哥都會參與，家輝在場也有參與動作設計。（影片截圖）
《低壓槽》先後遠赴日本、上海及泰國等地取景，由於當中有大量槍戰以及飛車等場面，所以每去到一個地方都要花時間交涉及安排，可謂心力交瘁，其中一場在上海拍攝的連環飛車爆破鏡頭，攝製隊就要封街拍足整整一星期多，認真程度可見一斑。家輝在戲中角色叫于秋，是警方臥底，但由於他行事獨立不受控制，故經常受到警隊的非議。為了改變罪惡之城的黑暗，更不惜挑戰城中最大的神秘勢力。除此之外，家輝為新作都碌盡人情卡，早前已知道徐靜蕾會飾演戲中的Final Boss，另外亦找來一班圈中友好參與，包括苗喬偉、張可頤、張繼聰、元華、秦沛、林雪、伍允龍等。有Paul哥參與，即刻諗起而家晚晚追緊的《天地豪情》。
片中有Paul哥秦沛閃過，好興奮，興奮到家輝誤打誤撞做出個粗口手勢都唔知。（影片截圖）