《反黑》結集電影社團猛人吳志雄陳惠敏 仲有吳毅將真警司陳欣健

撰文:許育民
出版:更新:

熱播中的網劇《反黑》,短短10集已於內地取得直迫3億的點擊率,而劇集在香港的反應都極好。不少人讚賞張建聲的招積演出夠衰格好睇之外,更多人談論是戲中有不少由細睇到大的電影惡人參與,特別有份親切感。
其實由第1集開始,見到成班叔父全體登場,大家已經連聲叫好,而且部分角色更用返大家熟悉的稱呼,如吳志雄叫大佬B,集體回憶立即加晒分。而家就同大家盤點下呢班叔父輩朋友。

同樣叫大佬B,在《反黑》中就飾演落難大佬,不過結局都係不得好死。
大佬B一直好睇陳浩南,所以佢在觀眾心目中同樣有一份敬重。

吳志雄(《古惑仔》大佬B)

在《反黑》中同樣叫大佬B的吳志雄,是個夕陽大佬,冇啖好食。雖然嚴格嚟講,大佬B只係在電影《古惑仔》系列首集出場,但事關佢為人夠義氣,又肯睇住班細,深得觀眾愛載。可惜最終被𡃁坤殺死,仲要係成家慘遭活埋嗰隻,令觀眾留下深刻印象。可能反應太好,導演劉偉強刻意在第3集《隻手遮天》要志雄哥翻生,仲過埋底去東星做笑面虎。搞笑係兩個角色的分別就只係一副金絲眼鏡,但成班洪興朋友就冇一個認得出,亦冇一句對白交代過,易容技勁過超人。

去到《古惑仔》第3集,戴副眼鏡就當另一個人登場,連一句對白都冇交代,出嚟行真係話係就係。
+2
陳惠敏在《隻手遮天》是東星話事人,重情重義,只係睇唔實自己班細。

陳惠敏(《古惑仔》駱駝)

惠敏哥在《反黑》中飾演神爺,是老鼎輩。惠敏哥本身個底有幾勁就不用多講,所以做親都係阿鼎,《古惑仔》去到第3集《隻手遮天》,就由佢飾演洪興的對頭東星話事人駱駝,為人重情義,甚至同洪興蔣生(任達華飾)有偈傾,不過旗下的鳥鴉同笑面虎唔係咁諗,覺得佢out晒,於是暗下毒手親手送自己大佬一程。惠敏哥的駱駝形象鮮明,但更叫人討好是他在《買兇拍人》中飾演的洪興標哥,帶兩分傻氣。

「係洪興標哥叫我嚟殺你!」結果拍拍下變成標哥親自落場,呢套《買兇拍人》,是彭浩翔得意之作。
吳岱融在《反黑》一角叫韓彬,是《古惑仔》中尹揚明個角色名,但其實造型同高天鷲一樣。
一開場,就同梁家輝飾演的任恩久講數,幾個表情幾對對白,就盡顯態度囂張無得傾。

吳岱融(《江湖告急》大口蓮)

因為《巨輪2》的鷲哥,令吳岱融的歹角形象成功注入新一代觀眾的記憶。其實吳岱融在90年代都拍過幾套三級片,都是演一些變態狂人角色,當中的邪氣也令他偶然會拍下江湖片做大佬,其中在梁家輝主演的《江湖告急》,大開蓮一角一開場就同梁家輝抗衡,幾有台型,可惜惡唔夠兩分鐘,就被爆樽收場,不過能夠短短幾分鐘戲就演到令你覺得佢抵俾梁家輝爆,都唔容易。

結果被任恩久爆樽,整個局面逆轉,非常好睇。
火屎一角,既衝動又魯莽,吳毅將也笑言部分性格跟自己相似。
在《弱殺》中,吳毅將起初扮斯文人,但偷窺鍾淑慧跳舞一幕時的掙扎,好好睇。

吳毅將(《弱殺》變態狂人)

好耐無見吳毅將,在《反黑》中的火屎,貫徹其火爆角色,駕輕就熟,但其實佢在電影作品中,更深人民心是演一些變態的角色,第一部叫人看得心寒,甚至為他定型的是1994年的《弱殺》,飾演有童年陰影的變態強姦犯,平時扮社工扮好人,其實暗中找不同目標,而戲中飾演智障的鍾淑慧就係目標之一。吳毅將在戲中不單會犧牲色相露股,又會剃光頭,而且每個行徑同表情都好似發自內心咁恐怖,睇到人驚鬼咗佢。要佢演一個黑社會衝動而狂妄的大佬,濕濕碎。

《弱殺》中要剃光頭,剃完個樣更帶幾分兇殘。
《三五成群》真係一代人嘅回憶,阿俊、神仙b這些角色一直深存在港人腦中。

宋本中(《三五成群》28座大王阿俊)

宋本中這個名字本來寂寂無名,但如果提起《三五成群》的阿俊,相信大家都會有印象他是誰。雖然在《三五成群》後他就再沒有代表作,一直做些跑龍套角色。不過醉心電影的他,卻一步一步學習,最終走上導演的位置。今次《反黑》令「阿俊」聲名鵲起,以後無人不識這位阿俊了!

宋本中(右三)為《反黑》導演,不少人都希望他參與幕前演出。
在《三五成群》中粗口橫飛,活現一個屋邨惡霸的角色,跟由他執導的《反黑》都有少許關聯。
當年的陳Sir,跟劇中的大Sir一樣有型。

真係做過阿Sir!陳欣健

戲中做阿Sir的除了陳小春及陳國坤,其實仲有位大Sir陳欣健。對不少年輕觀眾而言,呢位阿叔有咩咁特別?其實佢在行內打滾40幾年,拍過電影,做過編劇、又做過華星唱片高層,80、90年代仲不時做大騷司儀,實在是第一代跨媒體創作人。而更傳奇是他早在1965年考入警隊做過阿Sir,9年間更升做警司級,經常被提及的是1974發生在上海街寶生銀行挾持人質案,他是現場指揮,當時亦是TVB首次用衛星直播的新聞報道,故該片段經常被重溫。

在《反黑》中飾演張Sir的陳欣健,其實極有大Sir風範。