【2017電影回顧】亞洲電影《軍艦島》《出貓特攻隊》搶佔香港票房
香港人鍾意睇戲，連帶不同地區的電影都會引入上畫。以2017年計，今年來自不同「國籍」的電影可算相當強勢，特別是來自亞洲區的，韓國的《軍艦島》與泰國的《出貓特攻隊》，以偶像掛帥的，都輕易地成功過千萬。
贏叫座之餘，還有贏叫好的，就是來自印度的《打死不離3父女》以及韓國的《逆權司機》，正好同香港觀眾講，有血有肉的，才是好電影。
《軍艦島》《逆權司機》歷史又點會悶
今時今日想有部香港電影過千萬，真係唔容易，不過以韓片計，今年就有《軍艦島》《逆權司機》齊齊過千萬。一直以來，香港導演都甚少觸及歷史題目，怕年輕觀眾覺得老氣，好悶唔入場。但從這兩部韓片看，前者講一段二戰時期，韓國人的血淚史，而後者更是南韓民主進程的重要一頁，全部都真人真事改編，但大家就係鍾意睇，自動自覺買飛入場。要論成功之道，《軍艦島》找來偶像男神宋仲基主演，基本上已吸納好大批宋太入場，這不難理解，但連《逆權司機》這種沉重內容的都受歡迎，足見香港觀眾其實冇電影人想得這麼膚淺，你有膽量拍出一部港版《逆權司機》，大家就夠膽入場！
【逆權司機．懶人包】入場前要知的史實 光州事件由總統被殺引發
泰國電影唔再得人妖同拳霸
泰國娛樂圈近年相當活躍，泰劇盛行產生了大量偶像，連隨帶入電影圈。過往香港人對泰片的印象，離不開人妖、動作和鬼片，但今年的《出貓特攻隊》就走年輕人路線，看似青春片一齣，其實是將出貓這回小學雞事情，拍到特工電影一樣，真係刨支鉛筆都緊張都滴汗，所以香港便成功吸納年輕觀眾，大收1,500萬，連帶戲中幾位主角也備受追捧。
話說回來，泰片的優良傳統也得以保存，一套《屍約》，講一對好姊妹相約自殺點止其中一個走數，廿年後終於要來個奪命找數。故事夠貼地，再加上有猛鬼大廈取景，有埋真實故事做背景，冇得輸。
印度劉德華繼續發功
有印度劉德華之稱的印度演員阿米爾汗，每次的作品都定必引起迴響，而且部部都在關注當地各種社會問題。這部《打死不離3父女》，除了主力講女性在印度的地位受盡歧視，更道出當地體育界的迂腐和功利，簡直一針見血，而主角更是改編自印度體壇的真人真事，如果香港可以拍番部，都應該大受歡迎。由於夠熱血，香港人都齊齊力撐，結果票房累積衝破$2,340萬，成為香港電影史，印度片票房No.1，勢不可擋。