【2018期待電影】黃子華《神秘寶藏》等3年 《脫皮爸爸》仲未上

撰文:許育民
出版:更新:

2017年剛剛過去,不少人都在回顧自己今年看過最好或最爛的大電影。踏入新年,面向未來,當然就要數下有咩最新期待之作,但睇下睇下,先發現有幾部原來好面善,幾位「老友」真係老是常出現。
當中包括年初講明會上,張家輝第三部自導自演之作《低壓槽》;2016年偷步上畫,參選埋金像獎後,都未肯上畫,吳鎮宇主演的《脫皮爸爸》;最離譜應該係話明2015年會上,但上到今日都映期冇了期,黃子華主演的《神秘寶藏》。3部都係叫人期待之作,但點解要期待咁耐,係咪好似紅酒咁,愈擺得耐愈好?

《低壓槽》是張家輝第三部自導自演之作,亦是他首部執導的警匪電影。(影片截圖)
戲中會有不少特效加工,相信也有影響上畫進度。(影片截圖)

《低壓槽》預計今年上半年現身

在今年初的「影視博覽」中,家輝這部力作《低壓槽》曾經是話題之作,除了家輝已有一段時間未有新戲上之外,更是他回歸警匪動作,特別令人期待。原定2017年11月上,但後來一再延期,最新消息是2018年上半年會同大家見面,總算有個期,有個知字。

電影製作相當龐大,有到日本及上海等地取景,戲中家輝飾演警方卧底,一頭長髮加上留起鬍鬚的全新造型,在預告片中率先曝光,新鮮感十足。從預告片看,家輝獨自站在崖邊回想往事,然後畫面就出現一幕幕驚心動魄情節,包括逃亡、私刑、飛車、自殺場面。全片去到最後一幕,家輝先道出一句對白︰「我好懷念罪犯的味道」,似跟英文戲名《Taste the Crime》甚有關聯。

最近在街上見到最新的《脫皮爸爸》海報,都是寫上「2018即將上映」,未有正式映期。
鎮宇演古仔爸爸,一個奇幻變化令二人有不一樣的經歷。(影片截圖)

《脫皮爸爸》吳鎮宇候選埋男主角都未上

這部《脫皮爸爸》,真係等到影迷皮都甩。電影於2016年率先上優先場,從以拎到入圍金像獎的資格,而吳鎮宇亦不負眾望,順利入圍,跟余文樂(《一念無明》)、林家棟(《樹大招風》)等爭影帝,結果由家棟奪得。可能在獎項上未有斬穫,冇「即時性」,結果電影話會2017年12月上映,都臨時抽起,到目前為止都未有最新上畫消息。

電影改編自同名舞台劇,故事是講述由鎮宇飾演的老父,本來患上腦退化症,命不久矣,後來卻違反科學地不停甩皮回春,皮膚每日剝落一層,年齡也隨之下降,最終與其雙失中年之子古天樂,共度了一段不一樣的快樂時光。一個逆齡角色由89歲演到19歲,鎮宇全程都要化老妝搞到皮膚敏感,咁辛苦演,作品好應該得到善待,好想快啲有得睇。

不同階段都由鎮宇一人分飾,其實相當吃力。(《脫皮爸爸》劇照)
見到子華神同鄭中基合演,其實係想睇。(《神秘寶藏》劇照)
子華跟法拉合作完,再合演了《前度》舞台劇。(《神秘寶藏》劇照)

《神秘寶藏》等足3年夠晒神秘

同樣在「香港影視博覽」宣布會在2015年底上畫的《神秘寶藏》,一等又等了3年。其實上年10月,都出現過一道曙光,話會在2017年11月上畫,結果又在無聲無息下收起。不過睇番套戲,由鄭中基與陳嘉上宣布,會聯手執導這個以中國海盜張保仔為故事藍本的穿越喜劇後,都遇上好多波折。先有古天樂因檔期問題突然易角,由黃子華頂上,然後電影一話開拍,TVB就拎住「張保仔」同「穿越」呢兩大元素,搵嚟洪永城同陳展鵬開套《張保仔》,結果又俾佢抽水抽到飲頭啖湯,套劇都出街年半有多,「正版」到呢刻都未上。

最新消息係,電影都係未有映期,連後來先拍,黃子華主演的《棟篤特工》都鐵定今年賀歲了,到底呢個「寶藏」要收埋到幾時?其實子華會分飾兩角,分別是張保仔及張保仔後人,陳法拉亦都同時飾演鄭中基女友及黃子華老婆,其中古代的陳法拉仲會以女海盜造型登場。