【金像獎2018】《29+1》彭秀慧輕鬆迎戰:有信心同有壓力都冇用

撰文:張嘉敏
出版:更新:

今個星期日(15/4)就是香港電影金像獎頒獎典禮舉行的日子,憑住執導電影《29+1》獲提名今屆新晉導演以及最佳導演的彭秀慧,今日出席品牌活動時被問到對於自己得獎有冇信心,她表示:「有信心都無用,其實大部分嘅女仔出席都係想好好睇,打扮得好靚咁,我會以好輕鬆嘅心情去面對。行紅地氈係人生大事嚟,有得參與仲能夠獲得提名,已經覺得好神奇,完全感受到嗰種香港電影界大盛事嘅感覺。」

彭秀慧話會放鬆心情參與金像獎頒獎典禮。(梁碧玲 攝)

既然要靚靚咁出席,當然都要準備戰衣啦,至於可會性感上陣,彭秀慧笑言:「我企喺周秀娜隔籬,就算唔着都無用㗎喎,點都唔夠佢嚟,所以我唔會性感喇。」她又謂對於得獎與否不會感到壓力,坦言:「就算有壓力都無意思,都影響唔到個賽果,唔同跑步可以跑快啲,我都係放鬆心情等賽果公布啦。」

彭秀慧話企喺周秀娜隔離點性感都無用。(梁碧玲 攝)

她指該電影獲得如此成積並獲得提名亦算是有交代了,得獎的事就隨緣吧。她透露剛完成舞台劇,稍後會到日本宣傳電影,返來後就會認真去想想之後要做的事:「獲得提名就好似畀人鞭咗兩下咁,好似係叫我醒醒定定,要做好啲呀,所以我可能參與埋今次金像獎就有排都未有機會再出席㗎喇。」

彭秀慧將會認真去諗下一部作品。