【金像獎2018】黃秋生親回應自嘲演說差:一話有香港電影全場呆晒

撰文:林穎嵐
出版:更新:

前日(15日)晚上在尖沙咀文化中心舉行的第三十七屆香港電影金像獎頒獎禮雖然已經圓滿落幕,不過,黃秋生擔任最佳編劇獎項頒獎嘉賓時所講的一番言論卻一直在網上發酵,甚至被不同傳媒誤報成港獨。今日他就親身回應《香港01》,更自嘲演說技巧差。

黃秋生日前為金像獎頒獎禮擔任頒獎嘉賓,言論被扭曲引起一時風波。 (陳順禎攝)

昨晚秋生在個人facebook上罕有地以長文對事件作出回應,內容提及有網媒以訛傳訛,將其言論扭曲。今日秋生接受《香港01》訪問時說:「我諗係我今次好需要回應,你哋睇到嘅只係香港嘅報導,我睇到嘅唔單止係香港,台灣、內地,所有加加埋埋大概有50個媒體報導,已經傳到亂晒大龍,仲傳到去港獨,傳到已經係『呢條友你又港獨啦!』所以我一定要回應。」

秋生今日接受《香港01》訪問,首度向傳媒開腔回應「被港獨」事件。 (黃國立攝)
+2

秋生笑言,今次由神戲劇場主辦的舞台劇《夕陽戰士》,亦因為提及釣魚台等與政治語帶相關的字眼而影響贊助,更笑言:「我講句豆腐火腩飯,啲人都好驚㗎喎!」昨晚秋生為被傳提倡港獨的報導而在facebook作出回應,他直言:「有間網媒話我拉到去港獨,根本完全係將一啲我冇講過嘅說話加諸我口,然之後將呢啲說話拉到去港獨,同埋佢嗰個理據係好荒謬,我(喺篇文度)都已經冇引用出嚟!好諷刺,佢話喎,唔通話有河北電影啊?梗係得中國電影啦,咁我就心諗,咁武夷山烏龍係武獨?唔得!要中國烏龍!蘇州刺繡?咁就蘇獨!唔得!根本就夾硬扭曲香港電影四隻字,夾硬入罪,成件事係夾硬扣帽子,好得人驚。所以我一定要寫返啲嘢!」他更指今次「被屈事件」是澄清的最好時機,「因為有晒片喺度,有晒人證,現場千幾人,係最好嘅時機話俾你聽,我就係咁樣被人抹黑,千幾人見證,天助我也。」

秋生接受訪問時指,今次是澄清的最好時機。 (黃國立攝)

秋生指,今次他為金像獎準備的講稿,內容主要討論香港還有沒有香港電影,「好多人而家都話冇香港電影,出年仲有冇香港電影,冇人估到,但係我哋年年都仲有,即係你話死啦,香港電影死啦!唔係喎,仲未死喎!我嘅意思就係咁簡單囉!不過我一講話,仲有香港電影喎,全場木晒口面,咁係我講得唔好囉,表達得唔夠清楚,咁緊係我嘅問題啦,我又唔係演說家,再加上個劇本(講稿)係我自己寫,緊係做得好差啦,表演又表演得唔好啦,呢個完全係我嘅問題。」他笑言同類事件已非首次發生,更直言自己是位傳奇人物,「我覺得我無論係命好命唔好,行運定踩屎,咩都好啦,但我肯定I am a Legend!我係一個傳奇人物啊!傳奇唔係因為能力,因為傳到你傳奇,好似傳周潤發拍戲唔駛瞓,傳劉德華唔駛食飯一樣,傳咗就當係。」

秋生「自嘲」演說技巧差,不過笑言肯定自己是一位傳奇人物。 (黃國立攝)

化妝: Jolinn Ng (Anthony), Betty Wen
髮型: Ray Mork & Taky Chung (Anthony)@Fifth Salon 
服裝統籌: Claman Chu@神戲劇場
服裝: Bauhaus 
統籌: Ling Lo
場地提供: 高興 happinesssss
特別鳴謝:Frank Chan