【復仇者聯盟3】美國網紅連環入場喪睇 「無限觀戰」紅爆網絡

撰文:陳穎思
出版:更新:

Marvel十年大作《復仇者聯盟3:無限之戰》(Avengers: Infinity War)在世界各地大受歡迎,創下多個票房紀錄。一眾死忠Marvel迷豈會只睇一次,睇3次以上都大有人在,但美國有位超級擁躉自電影上映後,日日買飛捧場,有時仲一日睇兩次,截至昨日已睇足42次!

狂迷在4月30日表示第4次入場,「無限觀戰」正式開始。(網上圖片)

這位狂迷的社交網站戶口名叫「Nem: The Infinity Watcher」,即係「無限觀戰」,他本身是一名YouTuber,亦是Marvel超級粉絲,《復仇者3》於4月27日在美國上映,他當然會買飛捧場,就算看幾次也算是人之常情,但他比其他狂迷更瘋狂,在4月30日暗自下了一個決定,展開一場「無限觀戰」。

除自拍外,狂迷亦會上載戲飛證明自己真金白銀買飛入場。(網上圖片)

狂迷於4月30日在社交網站留言話要做一次瘋狂的事,原來就係每日睇一次《復仇者3》,狂迷每睇一次就在海報前自拍,證明自己並非純「打咭」,後來被網民質疑造假,之後他連戲飛都影埋出唻,昨日睇到第42次,終於谷到自己成功上報!

狂迷每一次都會做最後一位離場的觀眾,停車場得返佢架車。(網上圖片)

狂迷每次去戲睇都有花心思,每次穿上印住不同Marvel角色的T恤及帽子,連網民都忍唔住問他在哪裡買衫。雖然已見報,但這場「無限觀戰」仲未打完,狂迷今晨又上載新相,以第43次入場慶祝自己成為網絡紅人,未知他會否日日入場,直至明年5月《復仇者4》上映?