【職業特工隊6】盤點1至6集瘋狂特技 湯告魯斯到底要死幾多次？
1996年上映的《職業特工隊》（Mission Impossible），令湯告魯斯（Tom Cruise）轉型動作片演員，時至今日，他所飾演的打不死特工「Ethan Hunt」已深入民心。
由第1集開始至本周上映的第6集《職業特工隊：叛逆之謎》，靚佬湯上演過無數個危險動作場面，當中不少由他親身上陣演出，小編現為大家盤點N個令靚佬湯死過翻生的特技，看看他為了拍戲可以去到幾盡！
《職業特工隊》（1996）
首集眾多經典場面中，相信大家最記得靚佬湯由天花倒吊入密室偷取電腦資料一幕，不過要數最危險的場口，應該是炸爆巨型魚缸、過千加侖水湧出的戲碼，靚佬湯憶述拍攝這一幕時，一方面要力谷腎上腺素，務求跑得快過會淹沒他的水流，另一方面又要避開四圍飛的玻璃碎片，拍攝這一幕令他腳踝受傷。
第1集精彩劇照
《職業特工隊2》（2000）
毫無懸念，第2集最「牙煙」場面正是第一幕，靚佬湯在毫無安全措施下，徒手攀爬猶他洲峽谷地國家公園（Dead Horse Point State Park）的2000呎高懸崖，期間仲由一個石級跳向另一個相隔15呎的石級，完全係玩命，連導演吳宇森都話拍呢幕幾乎緊張到暈低，但靚佬湯就輕輕鬆鬆咁話：「我對我哋條Team好有信心，呢幕係成套戲拍得最過癮」。
第2集精彩劇照
《職業特工隊3》（2006）
拍到第3集，《職業特工隊》已成為一個品牌，而創造這個品牌就全靠靚佬湯的亡命演出，而這一集就有他徒手爬上海摩天大廈的場面，導演J. J. Abrams深知靚佬湯最愛搵命搏，一早講明不會實景拍攝，不過廠景都阻止不到他表現英勇一面的決心，只綁上一條安全帶親身上陣完成這驚險一幕。
第3集精彩劇照
《職業特工隊: 鬼影約章》（2011）
正所謂要贏人先要贏自己，第3集爬唔到嘅高樓，第4集就要爬到！靚佬湯吊住3條「威吔」、戴上手套就爬上位於杜拜的全球最高建築哈里發塔（Burj Khalifa）。導演Brad Bird睇住靚佬湯在2,722呎高的塔上盪來盪去，直言嚇到鼻哥窿都冇肉，第二朝訓醒仲成身冷汗，不過靚佬湯繼續輕鬆話：「唔跌落去就得」。
第4集精彩劇照
《職業特工隊：叛逆帝國》（2015）
這一集最矚目的，一定是靚佬湯徒手爬上即將起飛的A400軍用飛機，不論是在機身上「吊吊揈」，或是在機翼上艱險步行，觀眾都睇到一額汗。據悉，靚佬湯在兩日內一共拍了這幕4次，他表示過程最驚險的並非爬來爬去，而是不知何時會飛撲而來的雀仔，又謂拍攝過程中曾被小石擊中，還好冇打中塊面影響演出。此外，靚佬湯為拍攝一幕潛水戲，閉氣閉足6分鐘，工作人員都擔心佢會出事。
第5集精彩劇照
《職業特工隊：叛逆之謎》（2018）
小編覺得今集係集前5集之大成，跳樓、跳飛機、跳直昇機、徒手攀石、亡命追車，一次過滿足晒5個願望，年屆56歲的靚佬湯訓身演出，仲跳樓跳到骨折，實在不得不寫個服字。
其中一幕是他在飛機上，由2萬5000呎高空一躍而外，仲有結尾與「超人」亨利卡維爾（Henry Cavill）的直昇機追逐戰，在2000呎半空游繩爬上飛行中的直昇機，之後更急墜40呎撞向繩尾吊著的貨物，你想像到或想像不到的危險畫面，都可以在這一集看到，最可怕的是所有特技幾乎都由靚佬湯親身上陣拍攝，絕對值得一致好評。