《天地豪情》邊個最慘？ 蔡少芬死無全屍 陳錦鴻累死宣萱最內疚
撰文：何志衡
出版：更新：
《天地豪情》重播又重播依然大把人捧場，今晚嚟到大結局冇乜邊個有好收場，睇咗咁多集你又覺得邊個角色最慘呢？網友意見就認為蔡少芬慘被張家輝碎屍最可憐，陳錦鴻間接累死宣萱應該內疚一世，亦有人同情張家輝突然一無所有而變成喪心病狂係最可悲。
尾二嗰集講到，蔡少芬計劃被拆穿，張家輝心狠手辣將佢殺死。
《天地豪情》可以話死得人多，每個角色性格鮮明，亦造成佢哋得到呢個下場，睇得觀眾最心痛嘅可能係蔡少芬飾演嘅Diana，佢為咗搜集張家輝（甘量宏）嘅罪證，甘願假扮愛上對方兼訂埋婚，可惜俾張家輝無意間識穿，結果被他殺死兼碎屍，最慘係一啲證據都得唔到，死得唔抵！
張家輝為咗自己利益同埋避免壞事被公開，殺咗好多人。
陳錦鴻演程家雄為人天真戇直，一直唔願意同宣萱飾演嘅Kelly一齊調查張家輝，後來宣萱雖然獲得證據但係俾張家輝買兇殺死，陳錦鴻可以話間接累死Kelly；之後又知道Diana原來為咗救自己而被碎屍就更加內疚。
全劇最搶戲嘅張家輝不斷殺人、殺人、殺人，其實佢嘅角色都幾可憐，明明出身大富之家，點知原來係窮光蛋，追女仔又失敗，以為心愛嘅女人狠嫁自己原來又係假，壞事做盡結果得到報應，聽落又幾可悲！
羅嘉良喺劇中總算有個好結局，但係經歷嘅痛苦亦唔少。
演技派羅嘉良飾演大頭文，嗜賭成性，輸咗姑媽間餐館都未夠，連女友姚瑩瑩（Apple）爸爸間餐館都輸埋，落泊由加拿大返香港借錢還賭債，有個好女友Apple，點知佢患上血癌，為免令大頭文擔心，Apple隱瞞病情又講大話已嫁人，羅嘉良愛上郭藹明（程嘉鳴），後來Apple死後至知道實情，就同嘉鳴分手，不過佢算幾好彩，最終同嘉鳴復合仲結埋婚，所以最慘嗰個其實係Apple。
+14