【壹號皇庭】御用師爺葉振聲原來係配音員:一日都有5位數

撰文:
最後更新日期:

葉振聲在《壹號皇庭》第一輯飾演庭警,到第二輯就升了當律師,經常和在王菲、歐陽震華隔離。

深夜有追看《壹號皇庭II》,除了看到一眾主角二十幾年前青澀的樣子外,亦見到不少綠葉,尤其經常坐在王菲、陳秀雯、歐陽震華身邊的葉振聲,眼利的觀眾,應該記得他在第一輯是飾演庭警,現職無綫配音員的他說:「當時bobby同大宇都同我講笑,咦!你升咗職喎。。」劇入面升職,而現實中就轉職,葉振聲由藝員變了做配音員,佢代替已故林保全聲演《忍者亂太郎》中的山田老師,剛播完的《射鵰英雄傳》周伯通,及無數的日劇、美劇,他說:「幕前做唔到男主角,估唔到我喺幕後有機會。」

早前《不懂撒嬌的女人》劇中宣萱的經常抱著的常滿,原來是聲哥的愛犬。

葉振聲大約24歲入無綫,未入行前當過警察,他說:「17歲半入警校,做過軍裝、便裝,之後陪朋友報名訓練班,因為冇壓力呀,面試好放,所以入咗。」在第一輯《壹號皇庭》他當了整輯庭警,原來是珍姐欽點,他說:「珍姐知我做過差人,所以叫我去做,嗰陣啱啱訓練班出嚟,如果見到套劇有咩關於警察嘅嘢可以幫下手,阿姐好細微㗎。」當過差,善於觀人,亦懂自知,他說:「做咗幾年其實都知大約去到咩位,嗰陣咁啱有配音員訓練班,就試一試啦,因為單靠藝員嗰份真係得4位數,所以要求變,配音當時嚟講幾好揾,有時開通宵成千蚊一晚,好多配音嘅都係因為嗰陣儲到錢先買到樓,我都係。」

《忍者亂太郎》就是由葉振聲配音。

葉振聲享受幕前,誤打誤撞入了行,之後慢慢愛上演戲,更視它為夢想,但他知道現實很重要,他說:「我冇諗過要做到點呀?幾紅呀?剩係想做戲,做藝員尤其你唔紅一定辛苦,邊一代都係,而家嘅新人都係咁辛苦,我視做戲為夢想,但夢想要代價,你照顧好自己喇,再去支持你自己想做嘅嘢囉,而家係全職做配音,但如果有機會都想拍下戲㗎,我仲係好鍾意。」

《壹號皇庭》葉振聲有時當庭警、有時又做律師,更會做埋便裝,如果是這個年代一定被網友發現。

葉振聲由02年開始配音工作越來越多,現在科技進步,就算NG都沒有問題,但原來以前要1take過,他說:「而家有幾條聲道,你NG都冇問題,但以前得一條聲,一衰咗要由頭嚟過㗎,壓力大過拍戲,啱啱入行嗰陣好緊張,就算配人羣聲,講句『係啦』都成手汗,因為你驚累班前輩遲收工,唔好睇少一句半句呀,譬如大佬講一句『兄弟係唔係呀?』你要走上前講一句『係呀!』都要時間好準確,快少少、慢啲啲都要重新嚟過,好考功夫㗎!呢行其實對我嚟講,當然好揾過藝員啦,而家我配一日都有5位數字,好多電影都需要呢方面人才,以前我就多數配方中信、任達華。」

+6
+5
+4


X
請使用下列任何一種瀏覽器瀏覽以達至最佳的用戶體驗:Google Chrome、Mozilla Firefox、Internet Explorer、Microsoft Edge 或Safari。為避免使用網頁時發生問題,請確保你的網頁瀏覽器已更新至最新版本。