【早霸王】男仔成日被嫌幼稚唔成熟 森美教路:有計劃要講佢聽!

撰文:
最後更新日期:

每逢一到星期五這個日子,就知道係《早霸王》表白環節《你知道唔知道有人掛住你》的時候,今集繼續有男聽眾阿鵬打嚟,不過今次佢就唔係要搵森美小儀幫手表白,而係因為同女朋友嗌咗交,佢話可能因為金錢上壓力,對女友態度差咗,阿鵬話原來女友想買車:「我自己本身做揸車嘅,揸貨Van,本身自己養緊架車,但女友又想買另外一架車,喺我角度諗嘅話就變相就要養兩架車,咁我未必負荷到。」

又係表白環節「你知道唔知道有人掛住你」的時候。(網上圖片)

森美就好奇本身有架車,又做咩要冇啦啦買多架呢?阿鵬解釋:「其實我果架太大佢渣唔到,佢想買另一架就細架啲,佢同我一齊之前已經想擁有一部車,我哋住村屋都唔係好貴,佢都肯買二手車,只係可能講到呢到我腦就浮現好多數字,要計啊,一下子對佢態度差咗就變咗做導火線。」原來車只係導火線,真正嘅原因同天下嘅情侶一樣,就係女友覺得男友幼稚唔夠成熟,阿鵬話:「佢淨係成日同我講,你都唔夠成熟,你好多方面都好幼稚,咩幼稚先得架,你唔講我都唔知。」的確,女仔成日覺得唔講出口你應該會知,但其實唔講又點會知呢?

森美就教精大家喇。(網上圖片)

+5
+4
+3

縱橫情場多年嘅森美點會被佢難倒,佢就教所有男仔一招,大家聽住喇!「嗱!我教你,其實女人感覺男人成熟,就係對將來有打算,你耐唔時同佢講 我計劃嚟緊點樣點樣,要有計劃畀佢聽,好似好深思熟慮咁!」

阿鵬就堅持自己一直都有同女友講將來,但女友都仲係覺得佢幼稚,森美一聽就知出咗咩問題:「佢肯定覺得你將來冇打算好,口講有打算淨係得個諗,佢會覺得就太小兒科,實際上要為往後打算得仔細,要有用同有意思。咁咩為之有用有意思呢?就係你出去同朋友飲酒玩啊,對你嚟講係人生重要嘅事,但佢會覺得你淨係玩,好似你同阿強出去飲嘢咁,你就要講阿強阿好多生意架,有機架,出去飲嘢係投資嚟嘅!」好厲害嘅語言藝術!

森美教大家點樣令女仔覺得你成熟。(網上圖片)

+4
+3
+2

不過森美都話希望阿鵬係真真正正為女仔打算:「我都唔希望你呃人,如果你咩有打算,你就要話畀佢聽!」阿鵬表示對呢段感情係相當認真,唔係玩玩吓:「我之前同屋企人反晒面,所以我嘅世界就只得返我同佢,我同佢拍咗拖一年,佢唔係呃我錢嘅,只係呢排我大意撞到人架車,賠咗一舊錢,手頭有啲緊先態度差。」之後森美小儀當然就幫佢打畀女友,阿鵬好有誠意咁同女友道歉,同認真講佢將來嘅打算:「我想同你講對唔住,我因為金錢上嘅壓力對你態度差,但唔係有心嘅,雖然我有好多方面唔成熟,但我都改緊,希望以後條路幾難行都好,我想同你一齊行落去。」聽到都覺得Sweet,睇嚟森美呢招真係好Work,大家不妨學吓!



X
請使用下列任何一種瀏覽器瀏覽以達至最佳的用戶體驗:Google Chrome、Mozilla Firefox、Internet Explorer、Microsoft Edge 或Safari。為避免使用網頁時發生問題,請確保你的網頁瀏覽器已更新至最新版本。