【誇世代．有片】張繼聰被封殺繼續宣傳：如果係最後一套都無憾

今年首次一家四口過生日嘅阿聰，過得相當開心，平淡得黎又有驚喜，除咗電影劇組有送上蛋糕，佢仲分享家人嘅小心思：「今日好開心，朝早開工劇組有同我慶祝，返到屋企又有同家人食飯，太太同囝囝Handmade張生日卡俾我，爸爸媽媽煮咗豐盛大餐，連工人姐姐都自己整個靚蛋糕送俾我，原來佢係半夜偷偷地喺屋企整架﹗」謝安琪都有出POST表示，原來因為上年阿聰有投訴所以今年要識做：「舊年有人話我冇送生日禮物比佢……今年有哥哥同我一齊自製既生日pop up card，仲有一位令你情難自制嘅BB女喺你房等你。」

而阿聰仲開LIVE同網友分享生日願望，講唔夠幾句話題就轉咗Sales上身，不停宣傳《誇世代》：「大家有無睇誇世代呀，walking dead好睇下嗎﹗睇呢套戲四十幾集，日日追都成為生活一部分啦，多謝joe珍姐邀請我參演呢套台慶劇，仲有梳化服同事，50集有過百演員，真係要用好多心機好辛苦。仲有PA同事，可以話係最艱巨工作，如果你想鍛鍊仔女嘅就叫佢地入TVB做PA啦，做得幾年體格同品格一定變得好好……」下刪過千字感謝。

其實大家都知《誇世代》播出無幾耐，TVB就翻舊帳因為同蕭定一公司糾紛，而無端端封殺張繼聰，之後嘅宣傳活動都唔再邀請阿聰出席。雖然係咁，但其實阿聰一直有盡自己本份喺Facebook落力宣傳，呢日佢亦好感性地話：「隨住第50集播映完畢，我嘅TVB拍劇生涯應該暫告一段落啦，我都唔知幾時再喺電視機見到自己啦，所以都真係百感交集。如果呢套係我暫時最後一套劇，雖然拍嗰陣好辛苦好辛苦，但真係好滿足算無憾啦。呢段時機好多朋友問我做乜仲咁努力宣傳，唔係因為任何原因，只因為我真係好愛呢個作品。」