【早霸王】森美都難救 兵仔想道歉 女神講咗兩個名都唔係佢

撰文:
最後更新日期:

每逢星期五都有《早霸王》表白環節《你知道唔知道有人掛住你》。今日(1月19日)的節目中就有一位「撞聾男」打上電台想同心儀女仔道歉。呢位「撞聾男」阿邦之前本來約咗個女仔12點接佢,點知佢自己就甩咗底,之後個女仔特登唔聽佢電話。所以阿邦就打上電台俾森美,想森美幫手氹返個女仔。

森美同阿邦講電話都講到嬲嬲地。(網上圖片)

聽到呢度,你可能會以為只係一個男女朋友之間嘅故事。如果咁諗就錯啦。因為當森美問阿邦,佢同女主角Moni係咩關係時,佢就支吾而對咁話:「追緊,未正式喺埋一齊。」森美問點解未能一齊嘅時候,阿邦就話:「佢(Moni)有啲嘢放唔低,所以冇喺埋一齊。」森美仲安慰阿邦唔使勉強添。最後森美問阿邦準備好道歉講咩嘅時候,阿邦仲係支吾而對咁未諗定。呢個時候連森美都終於忍唔住鬧咗佢兩句:「仔吖,仔吖,點解唔諗?人生就咁過,女朋友就走㗎啦。」唉,講嘢一舊舊,又「撞聾」,連森美咁好脾氣都頂唔順。今次真係神仙難救。

以為自己係男主角,點知原來只係觀音兵,唉。(網上圖片)

最精彩的終於到啦。森美就打電話俾故事中嘅女主角Moni。森美問Moni知唔知邊個激嬲咗佢,知唔知邊個「掛住佢」。呢位Moni就話:「都係男女朋友關係,之後佢做錯啲事。」不過當森美問女主角知唔知係邊個打去電台,佢就竟然講錯名。「Ronald?(森美問身邊工作人員:係咪吖?再講多次?)Ronald。(森美:Ronald?唔係喎。)Larry。(森美問身邊工作人員:Larry係咪吖?又唔係!)咁係邊個吖?救命吖,咁恐怖嘅?(森美:咁多男仔嘅你?又Ronald又Larry,兩個都唔啱喎!)咁係邊個?(森美:唔講㗎,唔知邊個唔接得㗎。估唔中冇㗎!)」

【早霸王】男仔成日被嫌幼稚唔成熟 森美教路:有計劃要講佢聽!
【早霸王】結婚前一日電話終於打通 網民喪鬧浪費表白機會

最後擾攘咗一陣,女主角Moni終於估啱咗「阿邦」個名。「喂喂,你好,Moni?」「咩事?」「冇,之前我對你做咗啲,係囉。我失咗約,令到你咁唔開心。」(森美幫口:你會唔會原諒佢?)「Moni,eh,你會唔會原諒我?」聽完之後,Moni就好敷衍咁話:「原諒咗。」唉,又係一個「兵仔」激嬲「女神」的故事,人哋連講兩個名都唔係佢,係唔係自作多情呢?



X
請使用下列任何一種瀏覽器瀏覽以達至最佳的用戶體驗:Google Chrome、Mozilla Firefox、Internet Explorer、Microsoft Edge 或Safari。為避免使用網頁時發生問題,請確保你的網頁瀏覽器已更新至最新版本。