【果欄中的江湖大嫂】監製梁材遠勁讚馮盈盈：開金庸戲佢係首選
撰文：林迅景
出版：更新：
梁材遠（材叔）監製過唔少劇集，套套都係佳作。（江智騫攝）
《果欄中的江湖大嫂》30集都已經播完，日前（4月13日）各位演員與台前幕後工作人員相約一起食飯睇大結局。就連人稱「材叔」的劇集監製梁材遠也有出席。監製梁材遠接受《香港01》訪問時說：「大結局就未知幾多收視，大約係25，6點左右。」
梁材遠監製與一班資深編劇都有一齊去食飯㗎。（江智騫攝）
《果欄中的江湖大嫂》成績兼口碑反應這麼好，材叔又會不會「添食」再開同類型劇目呢？監製梁材遠說：「如果再開嘅話就係第2個題材㗎啦，希望可以同伍立光（編劇）合作。」伍立光：「下套魚欄囉，哈哈。」梁材遠：「事實上編劇佢哋做咗好多功夫，做咗好多資料搜集。其實好多嘢我哋唔係作嘅。政府搬遷計劃都係真嘅。果欄其實係一個好另類嘅地方。果欄商會會長祥哥都話，嗰度比之前塞車咗好多，啲人好奇多咗人落去。」
監製梁材遠：「我好欣賞呢班演員，希望台前幕後啲腳都可以再夾。譬如我哋之前做過長洲，宜家南丫島都想搵我哋合作。但係長洲同南丫島啲故仔又好近似，我哋圍村又做咗，鯉魚門又做埋。其實都係想搵一啲新嘅社區去做，社區故仔就貼地啲。」
梁材遠話成班演員為套劇出咗好多力。（江智騫攝）
材叔：「其實追戲睇嘅人好多，你要睇嘅套戲都有。有人覺得套戲有好傳統嘅道德同價值觀，但係又唔傳統，馮盈盈嗰條線又好鬼出軌，好離譜。其實編劇佢哋真係度得幾好。唔好甩咗啲年青觀眾，我覺得最緊要。（點解會搵馮盈盈拍劇，仲要第一次就咁多戲份？）其實我哋做監制有責任去發掘多啲新面孔。其實成日拍嚟拍去都係呢班或者有啲出咗去發達就會冇得用。」
梁材遠勁讚馮盈盈，形容係一粒新星咁話。（江智騫攝）
材叔：「今次我哋發掘到馮盈盈呢個新星啦，我覺得佢好有潛質。呢個𡃁妹好勤力，佢勝在捱得。每一次宣傳佢都會好出力幫手，呢樣我覺得好難得。喺宜家2018年，大家好忙碌好容易紅嘅時候，佢都ok嘅。（材叔你好睇好馮盈盈？）我好睇好佢㗎。我覺得宜家開金庸小說嘅戲，佢係首選。（咩角色？）佢啱做殷素素。」編劇伍立光：「佢有啲野性吖嘛。」
（左起）江嘉敏、馮盈盈、黃嘉樂、王卓淇。（江智騫攝）