【深宮計.專訪】李龍基認年輕時搵錢多 人如昏君李旦心軟蝕清光

撰文:陳栢宇
出版:更新:

只可惜心軟,無從去決斷……當年演唱《男子漢》的李龍基坦言,他在《深宮計2宮心計》裏飾演的李旦,其性格跟自己一樣心軟,不如歌詞那樣寫:男兒漢意志要堅剛!
他受訪時坦言這種性格弱點,曾令他蒙受過百萬元損失,耳仔軟亦令他無法拒絕別人邀拍三級片。提到他是飾演皇帝角色的「專業戶」,他笑指各朝代有各演法,亦指自己從不局限於皇帝角色:「唔使做皇帝,做殺人犯,我好開心!」
撰文:陳栢宇
採訪:游大東、陳栢宇
短片拍攝:陳順禎
場地及服裝提供:852 TAILOR HOUSE

李龍基飾演的唐睿宗李旦在《深宮計2宮心計》中可算是一個異類,身處傲視眾人的權力頂峰,卻比所有人來得仁慈。面對胞妹太平公主(陳煒飾)的驕奢淫逸,他選擇隻眼開隻眼閉;面對淑太妃(韓馬利飾)的陰險毒辣,他去到周一晚(2/7)播出的第卅一集,才萬不得已用匕首殺死撲向自己的對方,用手推開韓馬利一刻,仍然希望愛妃放下執着。

心軟。

李旦以感情行先,縱容太平公主(陳煒飾)在前堂後宮中橫行,其實劇中和現實是一面鏡,1,300年前的李旦,映照出2018年的李龍基,兩個人同樣重感情,他細細聲的說出想法:「李旦重感情多過理智,有啲人好重感情好少理智,有啲人好重理智好少感情,我都係屬於少理智嘅人。」曾經在歌壇風光一時的他坦言,自己因為缺乏理智思量,做過不少錯誤決定。

李龍基自認很多時都跟《深宮計》角色李旦一樣「衰心軟」。(陳順禎攝)

耳仔軟做生意 手下留情蝕幾百萬

李龍基承認年少得志搵錢搵錢太多,最高峰時月入24萬,曾擁有4個單位、5部車,可惜理財不善,引致他在80年代一舖清袋:「由細到大,啲大人都同我講一定做生意,你賣鹹脆花生都好,如果唔係就冇得發達。」他當時認為舞台上唱歌不可以做過世,搞生意至可以長賺長有,先後經營彩色沖印、卡拉OK、歌廳酒廊和海鮮酒家等,當中以搞兩間酒廊蝕得最甘:「但係做咩揩咩,所以而家好清楚了解自己唔係做生意嘅人,實在太心軟,譬如下屬有咩做錯,『下次唔好喇。』但真真正正做生意係冇得講感情,唔係佢死就你死。」

我諗當陣時都蝕咗幾百萬,好犀利,啲樓又賣哂,車賣哂,仲要俾啲貴利追添!
李龍基

遭TVB前導演整蠱 拍戲被迫與蔡美蘭「激戰」

除了投資失利,李龍基在演藝上亦曾經走錯一步。為了還債,「有咩就拍咩」的他不違言曾經拍過三級片《藝壇照妖鏡之96應召名冊》(1996):「當時我嘅心態係咩都做,有錢賺唔犯法我就做,但我盡量忘記自己拍過自己呢套嘢,搵我拍嗰個係以前TVB一個導演,我唔知佢會整蠱我。我接咗套戲,拍完第一日,冇嘢,第二日,冇嘢,第三日,我話『喂,唔得喎』,佢話『嚟啦嚟啦』,衰心軟。不過算啦,過咗去就過咗去。(影響好大?)都應該係,聽講套戲都好收得,嗰鑊大喇!後尾佢搵我拍第二集,我多多錢都唔制。」他沒有明言,惟看過這套情色片的人也知道,他口中所講「尷尬」一幕,是他與蔡美蘭在廁所中「激戰」的場面。

曾經有4樓5車的李龍基,為各樣蝕到入肉的生意散盡家財,亦拍過三級片。(陳順禎攝)

蕭笙叔邀客串王重陽 楊家將群星拱照李龍基

不過李龍基慶幸和感謝無綫早在80年代時已經向他伸出援手,他坦言已故金牌監製的蕭笙,見到他為自己在麗的監製《浣花洗劍錄》(1978)拍攝的主題曲唱片封面造型,覺得甚有味道,後來蕭笙叔過檔無綫後,便找他客串劉德華版《神鵰俠侶》(1983),其實早於1981年他已獲無綫高層馮吉隆(馮寶寶兄長)邀請,以歌手身份加盟,後來順理成章拍劇去也:「蕭笙叔可能仲記住我呢個樣,就搵咗我客串下王重陽,去到1985年拍《鍾無艷》(梁家樹監製),先叫做真真正正咁拍嘢,一開始就做皇帝(宣王),但係呢個齊宣王啱喎,啱我喎,因為戇居居咁樣,齊宣王真係戇居居。」

李龍基除了演過《鍾無艷》齊宣王,他亦演過《楊家將》(1985)宋太宗、《西遊記》(1996)玉帝、《聊齋(貳)》(1998)皇帝、《尋秦記》(2001)莊襄王等君王角色,加上現在的《宮心計2深宮計》,確實可算是扮皇帝的專業戶。他笑指除了清代的皇帝,其他朝代的皇帝都有點昏昏庸庸:「拍完《鍾無艷》後,我發現皇帝呢種角色真係有佢嘅獨特之處,之後公司就欽點咗我做《楊家將》嘅皇帝。」

談到當年掌舵無綫的邵逸夫,1985年曾下令監製李添勝一個月內完成整套《楊家將》(李添勝曾透露拍此劇期間飲雞精飲到便秘),更出動全台當家小生、花旦硬撼亞視舉辦首屆亞洲小姐,李龍基直言自己都感受到那份壓力,因為他要演得比自己更加強大:「周潤發、梁朝偉、苗僑偉、戚美珍粒粒巨星,如果演得自己好卑微,就弊傢伙唔似皇帝喇,所以點都要頂住。我記得有一場戲好犀利,60幾個演員,個個企喺匯報畀皇帝聽,得一個坐喺度,就係李龍基。」

1978年李龍基為麗的劇集《浣花洗劍錄》演唱主題曲,唱片公司EMI讓基哥以一身古裝扮相拍攝唱片封面,結果該劇監製的蕭笙叔賞識,成為日後他「棄歌從演」的轉捩點。(網上圖片)
李龍基是無綫御用皇帝,曾在1985年重頭劇《楊家將》中飾演宋太宗,劉德華、梁朝偉等巨星都要向他「俯首稱臣」。(陳順禎攝)
TVB而家啲人都唔係叫我李龍基,一見到我就係「皇上」,哈哈,可能真係太深入民心。
李龍基

李龍基卅年前想演李隆基:而家唔會!

李龍基坦言演皇帝演得太多,有些少被定型的感覺。不過他事實上都演過不少「非皇帝」的市井角色:「好似《900重案追兇》(1996)裏面做殺人犯林永才咁,我接到呢個角色時好開心,終於唔使做皇帝!可以畀我去發揮自己另一種嘢,我都做過好多低級差佬,《離島特警》(1998)、《大城小警》(1989)咁,甚至乎演流氓,好似係《真情》(1995-1999)裏面做好姨(薛家燕)以前個契家佬咁。當時我諗咗啲方法令自己完全搣甩皇帝印象,睇落賤啲,我諗咗招,搲腳趾,又真係好出。」

提到李龍基在其「皇帝」生涯中從未飾演過唐玄宗「李隆基」,有不少觀眾其實好想睇到這個「世紀演出」,問他其實會否好想圓大家心願,他即笑謂:「30年前就會想做李隆基,而家唔會喇!(點解?)冇說服力,或者演李隆基後期,即係楊貴妃嗰時,昏庸啲嘅時間。若然有呢啲劇本,都有少少興趣。(即係30年前你應該做做江華喺《楊貴妃》個角色?)全中!」

李龍基指自己不會演「李隆基」,粉絲心碎了。(陳順禎攝)
+36
發表評論...