【深宮計】破30億點擊演員輪流派福利 張文慈泳照大戰黃心穎
撰文：洪曉璇
出版：更新：
《宮心計2深宮計》進入結局篇，宮內各人好似陳煒胡定欣同周秀娜劉心悠，馬浚偉同蕭正楠馬國明，鬥爭都漸趨白熱化階段，收看次數亦節節上升。監製梅小青7月4號於網上宣布劇集雙語播放量破30億，一眾演員都兌現承諾，紛紛貼出泳照派福利。
《宮心計2深宮計》雙語播放量破30億。（Facebook圖片）
之前點擊突破20億時，太平公主陳煒已率先貼出仙氣童年照，嚟到30億當然要加碼﹗煒哥留言話：「說好的泳衣照22年前的太平公主﹗」佢貼上當年22歲參選亞姐時嘅相片，著上桃紅色一件頭Deep V泳衣，一頭短髮青春可人。飾演汪司膳嘅張文慈，話晒係一代性感女神，福利照點可以執輸。Pinky留言話：「說好的30億福利來了！18年前現代版床照相一張！小青姐～ 這張收貨嗎？」Pinky瞓喺床上，著上白色吊帶裙難掩好身材，連床照都出埋有咩可能唔收貨呀﹗
張文慈話晒當年都係性感女神，呢張床照真係殺死人。（張文慈微博）
一班前輩紛紛出招，後生一輩無理由唔出手架，黃心穎就「正面反擊」，貼上一張瞓喺度享受日光浴嘅相片，白色比堅尼盡顯好身材，粉絲爭相俾like，唔知馬國明睇完又收唔收貨呢？除咗三位美女，蕭正楠同馬浚偉都有貼出福利照，唔知「元玥」劉心悠，同埋「純熙」周秀娜幾時先出手呢？
黃心穎貼白色比堅尼泳照。（黃心穎微博）
蕭正楠呢張福利照，嚴格上嚟講係裸照添。（蕭正楠微博）