陳柏宇感動到喊住宣布 「隱世B女」出世：Abigail, I choose u!
撰文：洪曉璇
出版：更新：
又有個靚靚星二代出世啦﹗陳柏宇（Jason）自宣布老婆符曉薇（Leanne）有喜之後，去到邊都掛住BB喺口唇邊，之前跟足西方傳統切蛋糕公布腹中塊肉係囡囡，「隱世B」呢日終於出世啦﹗
陳柏宇上載一家三口合照，宣布囡囡已經出世。 （陳柏宇IG）
陳爸爸喺25號中午12點左右，上載一家三口合照宣布囡囡已經出世。Leanne最終選擇剖腹產女，相片中應該仲喺手術室中，Jason兌現承諾入產房陪產，唔知有冇親手剪臍帶呢？BB女眼線好長應該係大眼妹嚟架，仲有好多頭髮添﹗陳爸爸留言話：「我一見到佢就忍唔住喊。Abigail, i choose u!!! (throws out pokeball)」
睇返Leanne之前上載嘅超聲波照，醫生話BB個鼻又高又直，大家覺得同真人似唔似呢？（符曉薇IG）
之前Jason做訪問時講過，囡囡預產期喺十月，依家早少少出世可以陪父母過中秋節啦。而留言中嘅Abigail應該就係陳小B嘅英文名，呢個名係希伯來文，意思係「她父親的喜樂」以及「喜樂的泉源」，Jason都留言話一見到囡囡就感動到喊，呢個名真係相當有意思。之前Jason講過會自製侍產假幫手湊女，仲早早請定陪月兼上堂學換片，相信嚟緊呢位好爸爸都有排忙啦。