戴耀明圓亡父心願 首登巴士車身廣告:後悔無比佢過好生活

撰文:
最後更新日期:

戴耀明為了自己的嘜頭,試過由銅鑼灣遊車河到筲箕灣。「個巴士司機見到我上車嗰陣,以為係玩偷拍節目」

能夠見到自己嘅嘜頭出現喺巴士車身上到底有咩感覺? TVB「御用傻仔」戴耀明入行25年,近日因一個地產廣告,令其嘜頭分別出現於不同的巴士車身上,戴耀明興奮得拍下多張有自己嘜頭的巴士圖,並在fb發文表示亡父與他的對話:「佢講笑地說 : ( 衰仔,希望有一天 老豆揸的巴士會有你的廣告,等老豆可以喺巴士面前影張相 )……對不起老豆,當年未能趕及完成你的拍照願望!!今天這埸景,希望在遠方的你看到。」

對巴士有情義結,索性自己整架巴士出嚟。

戴耀明接受電話訪問時,表示爸爸在他加入亞視初期(約20多年前)曾開玩笑叫他接一個可以有巴士廣告的廣告:「因為嗰陣只有大紅大紫嘅明星先會有巴士廣告,佢話如果有接到呢類廣告可以等佢威比同事睇,嗰陣我剛剛讀完訓練班出道。」戴耀明自此一直將這個玩笑記在心。自小已經是巴士迷的他,曾花上一星期整出一架紙巴士,問到爸爸做巴士司機時會否日日幫襯,戴耀明說:「又唔會,怕阻住佢工作,同埋嗰陣巴士未有冷氣,啲人成日喺上層食煙,一入隧道真係想死。」

戴耀明話國內工作唔係成日都有,所以一有空檔佢就會返TVB拍劇。

「其實覺得自己幾唔啱,因為爸爸到後期行動好唔方便,但過程中……點講好呢……自己無俾過好嘅生活佢。」戴耀明指多年來因為工作關係,加上以前收入不多,故從未帶同父母外出搭飛機,到後來父親因患病而行動不便,就更無法出門遠行,現在偶爾想起也會覺得是個遺憾,但慶幸的時在爸爸離開前,他已經有了知名度。「爸爸因為老人痴呆症,媽媽要照顧佢都好辛苦,佢會成晚拍醒阿媽,大家都好崩塌。」由於是獨子關係,所以近年戴耀明就算北上工作也不會全身投入,近日他正忙於拍攝大台新劇《殺手》,預計11月完成。
 



X
請使用下列任何一種瀏覽器瀏覽以達至最佳的用戶體驗:Google Chrome、Mozilla Firefox、Internet Explorer、Microsoft Edge 或Safari。為避免使用網頁時發生問題,請確保你的網頁瀏覽器已更新至最新版本。